Ang lakang ni Presidente Benigno Aquino sa paghashas ug pagkontrolar sa mga opisyal nga nagdumala sa mga korporasyong kontrolado sa gobyerno usa ka positibong lakang aron ikapamatuod niya sa mga Pilipino nga sinsero siya sa pagdumala sa nasud.
Usa gud sa masil-ing sa mga kabus ug ordinaryong mga magbubuhis mao ang tag minilyon ka pesos nga suhol sa mga opisyal nga anaa sa mga ahensya sa gobyerno labaw sa tanan ang kontroladong korporasyon niini.
Sa kadagko sa ilang posisyon inubanan sa dagko usab kaayong suhol murag anugonan ang mga kabus sa kuwarta nga buhis sa katawhan nga gastuhon sa dili na angayan pang gastohanan.
Kun ang presidente sa nasud halos nagdawat lang og P100,000 matag buwan, unya ang ubang mga opisyal sa gobyerno may minilyon ka pesos ang dawatong suhol matag buwan, nganong ingon man niini?
Ka espesyal gud sa maong mga tawo kun imong hunahunaon nga unta ang ilang trabaho sayon ra mang trabahoon sa mga tawong magkangkang na sa pagdawat og bisan P50 mil lang.
Kun makadungog ka nianang tag P1 milyon ang buwan murag magpangurog ka sa kaanugon sa kuwarta sa mga Pilipino nga mahipunta lang sa bulsa sa pipila ka mga opisyal sa gobyerno.
Samtang kun imong sutaon, puwerting daghana sa halos wa nay makaon adlaw-adlaw gumikan sa kakabus.
Makapangutana ka giunsa man pagdumala sa gobyerno ang Pilipinas diin hain tong kabus kaayo mosamot man sa pagka-ut-ot ug kadtong mga adunahan mosamot man ang kakuwartahan.
Way kaso sa mga pribadong tawo nga mipadagan og mga negosyo nga nakatabang sa ekonomiya sa Pilipinas kay kun makuwartahan sila, bunga kana sa pagsaka sa ilang negosyo.
Apan sa usa ka opisyal sa gobyerno nga mahimong milyonaryo, gikan sa buhis sa katawhan, maayo pa ba ni? Di ba?