EDITORYAL - Ang panigarilyo

Sakit man alang sa pipila ka hinigarilyo, apan alang sa kaluwasan sa mayoridad gilusad ni Mayor Alfredo Lim sa Manila ang ‘martial law’ batok sa mga hinigarilyo sa Manila City Hall.

Sa iyang mando, walay pasayloon gikan sa mga dagkong opisyal hangtod sa labing ubos nga kawani sama sa janitor ug ang silot nga ipahamtang magsukad sa multa hangtod sa pagka-bilanggo sa malapason sa balaod.

Ang pagbiya sa panigarilyo di sayon nga buhaton sa mga hinigarilyo. Gani may mga hinigarilyo nga usahay makalitok nga mas makabiya pa sila og asawa kay sa pagbiya sa sigarilyo.

Alang sa hinigarilyo, ang pagbiya sa sigarilyo makapaburong sa tawo ug susama ra sa gibiyaan siya sa labing suod niyang higala sa kinabuhi kay ang pagpanigarilyo  sama ra sa imong barkada nga sa higayong moundang ka, mura og gibiyaan ka og labing suod nga higala.

Ngano man kay sa panahong may problema ka, bisan wa na kay makaon, inigbulhot nimo sa aso sa sigarilyo murag ikaw ang labing malipayong tawo sa kalibotan.

Sa panahong moundang ka, nawad-an usab ka og gana sa kinabuhi, wala ka nay ganang mokaon, kun makakita og manigarilyo maglaway ka labaw na kun makasimhot ka og baho sa sigarilyo, murag lisud kaayong pugngan ang imong kamot gikan sa pagpanghinol niini sa imong bulsa pamasin nga anaa pay sigarilyo.

Sa pagpatuman ning maong balaod, gikinahanglan usab dinhi ang gitawag nga ‘political will’.

Kay kun luya ka sa pagpatuman sa hustong balaod gumikan sa kabalaka nga di ka na unya botohan tungod sa imong paglutos sa mga hinigarilyo, mas maayo pang mopahuway ka nalang kay sa pasagdan nimo ang balaod nga yatakan sa katawhan tungod lang sa ilang bisyo. Di   ba?