Botika canvasser; Mabanto ug pamolitika ni Cortes

Nag-rally ang mga traysikol drayber sa Mandaue batok sa chairman sa Traffic Management Board sa Mandaue nga si city prosecutor Bienvenido Mabanto.

Gireklamo nila nganong nausab kuno ang palisiya sa TMB sa pag-isyu og prangkisa sa ilang mga traysikol nga imbes tulo ka tuig ang termino sa prangkisa, nahimo na lang kining usa.

Pero nganong si Mabanto man ang ralihan?

Ang magpanday sa palisiya ang Traffic Management Board, dili si Mabanto. Isip chairman, si Mabanto igo lang mo-preside sa mga meeting. Ang mo-aprobar sa palisiya mao ang board mismo, dili lamang si Mabanto.

Usa sa mga miyembro sa TMB miingon nga gihimo nilang usa ka tuig na lang ang prangkisa tungod kay kun tulo ka tuig dili nila ma-monitor ang insurance sa matag traysikol nga ang coverage tagsa lamang ka tuig, dili tulo ka tuig.

Sumala pa sa mga drayber sa traysikol, kun moadto kuno sila sa opisina ni Mabanto, lecture kuno ilang mapaminawan kang Mabanto.

Kun dili kita ganahan maminaw sa lecture, magtarong usab kita sa atong pagpamasahero, dili kita magpabadlong aron dili mangabara ang trapiko.

Kun walay usa o duha kaninyong mga drayber nga nagpabadlong sa inyong pagpamasahero, aw, duna kamo’y katungod pagreklamo kang Mabanto. Kun wala, angay kamong maminaw og balikbalik og lecture hangtod makat-on sa balaod sa trapiko.

* * *

Unsa kahay nasulod sa hunahuna ni Mayor Jonas Cortes nga nagsige man kini og duso nga ang siyudad sa Mandaue mahimo nang lone congressional district.

Wala pa gani makuntinto ang mga Mandauehanon sa performance ni Jonas, naghunahuna na kini og politika.

Lisod man kaayo kining paghimo og lone congressional district sa Mandaue tungod kay mabiyaan man ang duha ka lungsod nga mao na lay kauban niini sa ika-unom nga distrito, human naunhan kini sa Lapulapu sa pagkahimong lone district.

Ang maong duha ka lungsod nga mao ang Cordova ug Consolacion ang mabiyaan kun ang Mandaue maghimo og iyang kaugalingon nga distrito. Seguro okay lang sa Consolacion nga sikit man kini sa Mandaue o Lilo-an. Mahimo man kining mosagol ngadto sa laing distrito sa ika-lima ba o sa Mandaue district.

Unsaon naman lang nang Cordova nga tua man mahimutang sa luyong bahin sa isla sa Mactan? Unya dili man intawon kini mahimong pabugsayon ang Cordova aron motipon sa siyudad sa Mandaue.

Bitaw walay komedya, kining sitwasyon karon sa tulo ka lokal nga kagamhanan nga mao na lay naglangkob sa ika-unom nga distrito talagsaon kaayo nga sitwasyon, nunot sa paghimulag sa dakbayan sa Lapulapu.

Dili man usab kita mahimong mopugong sa paglambo sa politikanhong dagway sa Lapulapu.

Apan mismo si Kongresista Luigi Quisumbing nagkanayon nga sa iyang pagsuroysuroy sa Mandaue, wala man maghisgot ang mga Mandauehanon sa lone congressional district sa Mandaue.

Si Luigi man ang miingon mismo nga ang mga tawo sa Mandaue naghikutar man sa batakang panginahanglan ug dili man ang mga politikal nga kalambuan, ug mao man kini ang ‘main concern’ sa katawhan diha sa Mandaue.

Bitaw, serbisyo unta ang angay hisgutan ni Jonas diha sa Mandaue, dili ang politika.

Ako ra ba nailhan ko diha sa Mandaue City Hall og “kontra-bida” kay ngano kunong kanunay ko nga manaway ni Jonas. Sige lang og kontrabida, basta ang akong pagsaway kang Jonas dili personal kun dili sa mga palpak diha sa iyang pagdumala sa Mandaue.

Sumala ba gud, sukad nga si Jonas maoy mayor sa Mandaue, nagyagaw na ang pista, unya ang Ms. Mandaue pinordoy na lang gyud intawon. Ambot asa ang budget sa kalihukan nga sa matag adunay presscon, ang mga reporter pakan-on na lang gani og pan, wala pa gyuy pares nga ice water.

Mangimbitar pa og coverage sa kalihukan pero ang mga reporter nagreklamo intawon kay papletehon og ila, dili gani makahatod sa labing duol nga naoganan.

* * *

Kamong mga pasyente ug mga kliyente diha sa Vicente Sotto Memorial Medical Center (ang karaang Southern Island Hospital) angay kamong magbantay sa mga “canvasser” sa mga botika diha sa dalan B. Rodriguez.

Adunay kaugalingong DOH pharmacy ang VSMMC nga nagbaligya og barato nga mga tambal. Apan adunay mga canvasser nga anha mag-estambay duol sa entrance sa VSMMC aron sugaton o manawag og mga pasyente nga mamalit og tambal.

Sumala pa sa amigo nakong opisyal diha sa VSMMC, aduna gyuy mailad nga pasyente, ilabi na kadtong mga taga-probinsiya intawon ug kadtong mga pasyente nga sagolan og gulat-gulat sa mga canvasser.

Awhagon tingale nato ang siyudad sa Sugbo o ang barangay Sambag II sa pagtan-aw niining sitwasyona basin og aduna silay mahimo batok niining mga canvasser sa mga botika diha sa B. Rodriguez.