Ang tugon ni Padre Soc

Tuig 2001 sa dihang nisulod ko sa Seminario Mayor de San Carlos aron ipadayon ang akong pagtuon sa Teolohiya ug tuig 2006 sa dihang ako nakatapos. Sa maong mga katuigan, akong nahimong Spiritual Director si Padre Soc Saldua. Matag karon ug unya magtabi gyud mi iyang kumostahon ang akong kahimtang ang akong bokasyon. Apan dunay mahinungdanong tugon si Padre Soc alang kanako: “Maayo lang ang pagkapari Dodong sa unang tuig. Kining tuiga usa ka honeymoon ang sunod nga mga katuigan mao na gyud ang tinuod. Wala kaayo nako kini hisabti apan karon, ako makaingon nga husto gyud si Padre Soc. Ang unang tuig maoy hayahay ang sunod nga mga tuig mao na ang tinuod. Kay ngano? Dunay mga panghitabo nga moabot sa imong kinabuhi nga lisud kaayo sabton ug daw sa lisud kaayo tugkaron.

Karong Domingoha mao ang World Day of Prayer for Vocations. Diin atong hatagan og igong pagtagad ang pag-ampo alang sa mga relihiyoso ug mga sakop sa mga Sagradong Orden. Dili sila mga anghel ug mga tawo lamang. Ug kay tawo dunay tawhanong panginahanglan. Ang sukaranan aron ang usa ka pari mamahimong Balaan mao ang pag-angkon nga siya tawo ug dili anghel. Mao nga niadtong buot mosunod sa mga tunob ni Jesus pinaagi ning kinabuhia, hinuklogi una. Ug ang si bisan kinsa nga anaa na sa maong pagkinabuhi, pamalandongi kun nagmalipayon ka pa ba. Basin dunay kulang kun nganong wala ka mahimutang. Sa akong tan-aw maayo kang mobatbat sa Salmo sa Magbalantay apan wala mo hiilhi ni higugmaa ang Magbalantay!