35 ka sakong bugas humay ang gikatahong gikawat sulod sa warehouse sa Cebu Provincial Detention and Rehabilitation niadtong Lunes sa hapon. Ang maong mga sinakong bugas gitagana unta sa Kapitolyo alang sa mga mabiktima og kalamidad dinhi sa lalawigan.
Si Marivic Garces nga maoy provincial social welfare and development officer sa Kapitolyo miingon nga usa ka Antonio “Tonying” Babor, driver sa CPDRC, maoy responsabli sa pagpangawat sa maong mga sinakong bugas.
Si Babor nangangkon nga gisugo siya ni Wilson Ramos, staff ni Garces, paghatud sa bugas paingon sa Eco-tech Center tungod kay duna kunoy mga kabus nga mga bata nga hatagan niini.
Apan matud ni Garces nga dili tinuod nga si Ramos maoy misugo kang Babor tungod kay on-leave si Ramos niadtong Lunes ug Martes. Kun mao kinsa man ang nagsugo kang Babor?
Ang proseso pag-withdraw og bugas gikan sa bodega mao nga kinahanglan nga dunay pagtugot gikan mismo kang Garces. Way bugas nga makagawas sa bodega kun way pirma gikan ni Garces.
Apan ang nahitabo mao nga wala kuno ang in-charge sa bodega atol sa maong higayon nga si Manuel Anoba. Si Babor maoy gibinlan sa yawe sa bodega hinungdan nga nakapabor siya pagkuha sa mga sinakong bugas nga way nakabadlong niya ug nangita sa pirma ni Garces.
Pero yuna pa, grabi naman pud ka sulagma nga ang giingong maoy nagsugo on-leave diay niadtong higayona ug supply officer nga si Anoba wala sab diha sa dihang nahitabo ang pagkuha sa sinakong bugas? Wala kaha ni tuyo-a?
Ang lu-oy kay si Babor maoy nadut-an sa tanan. Busa kun ako’y Babor mas maayong iyang itug-an kinsay iyang kakunsabo. Suma pa ni Garces nga dunay tulo ka sako nga bugas nga nakit-an nga gi-deliver didto sa panimay ni Babor.
* * *
Si Gobernador Gwendolyn Garcia mimando na sa paghimo og imbistigasyon sa nahitabong kawat sa bugas. Pero hinaut nga dili lang si Babor ang imbistigahon kun dili apil pud ang giingong nagsugo ug ang supply officer.
Nangangkon man kaha si Babor nga gitawgan siya sa telepono, pwes maayong susihon tinuod ba nga dunay tawag sa telepono pinaagi sa pagkuha sa iyang cellphone. Mamahimong tan-awon ang log sa iyang cellphone kinsa ang mga tawo nga mitawag niya niadtong adlaw nga gihakot ang bugas.
Labing maayo og ipaubos silang tanan sa lie detector test aron masuta kinsa nila ang nagsulti sa tinuod.
Dili man gud makiangayon nga daghan sa mga kabus maamtan intawon og hapon pag-atang nga makakuha og hinabang gikan sa Kapitolyo tungod kay daghang mga requirements nga gikinahanglan nilang i-kumpleto.
Apan niining hitabo-a yano ra nga na-release ang bugas bisan way klarong pagtugot gikan sa department head ug kwestiyonable pa gyud hain mopaingon.
* * *