Sex video isip ebidensiya

Gisupak ni Bella Ruby Santos, suspetsado sa pagdagit ug pagpatay ni Ellah Joy Pique ang pagpakita sa sulod sa CD, USB ug video camera ngadto sa publiko tungod kay makahatag kini og kauwawan sa iyang pagka tawo. Hinoon muoyon siya kun ang sulod sa nahisgutang mga ebidensiya ipakita lamang ngadto sa mga representante sa Criminal Investigation and Detection Group o CIDG, sakop sa media ug huwes nga si Meinrado Paredes.

Una niini gipadayag ni maghuhukom Meinrado Paredes nga ang sulod sa CD, USB ug video camera nga mga ebidensiya sa kasong giatubang ni Ms. Santos puyding makita sa abling hukmanan aron makita kini sa publiko ug aron mawagtang usab ang mga pagduda unya sa unsa may sulod niini.

Ang maong pamahayag sa maghuhukom gisupak ni Ms. Santos tungod kay ang nahisgutang mga ebidensiya aduna kini sulod nga seksi niyang hulagway ug esina sa lawasnong kalipay uban sa iyang hinigugma nga si Griffiths.

Iya usab nga gisupak ang pag-abli sa mga sulod sa CD sa pagtoo nga giusab na ang sulod niini aron gayod mataral siya ug ang iyang hinigugma sa hukmanan tungod sa kamatayon sa unom pa lamang katuig nga si Ellah Joy.

Dunay punto si Ms. Santos sa iyang pagsupak sa pagpakita sa sulod sa mga ebidensiya ngadto sa publiko. Ang pagpakita sa sulod sa mga ebidensiya ngadto sa publiko makapaubos sa iyang pagka tawo ug pagka babaye.

Gibana-bana ni Ms. Santos nga adunay mga napulo ka esina sa video camera diin siya ug ang iyang uyab nga Briton nagdimdim sa di ikapangagda nga kalipay. Gawas pa niini aduna pa gayod siya’y mga seksing hulagway nga anaa sa sulod sa mga ebidensiya. Busa kun kini ipakita sa publiko mahimo kining sumsuman ug piyestahan sa katawhan.

Igo na seguro nga makita sa maghuhukom, representante sa media ug CIDG kun unsa man ang sulod sa mga ebidensiya. Pinaagi niini dili na seguro magduda ang publiko. Nag-atubang man tuod og kaso kini si Ms. Santos apan babaye ra gihapon kini siya ug tawo nga bati-on og kauwaw. Angayan natong hinumduman nga suspetsado pa lamang kini siya, dili pa man gani kini siya akusado. Kun ang akusado sa atong balaud gi-presumed nga inosente unsa pa kaha ang suspetsado lamang.