Laing pribadong sakyanan ang nasakpan sa LTO-Task Force Alpha didto sa M. Velez Street nga migamit og “expired” na nga commemorative plate nga gitabon pa sa orihinal niini nga plate numbers sa atubangan.
Akong pahibaw-on kadtong mga padayon pa nga migamit karon sa mga commemorative plate nga PMA-PNPA 94 nga dili na kini mahimong gamiton kay mi-expire na kini kaniadtong Abril 8, 2011.
Ang commemorative plate nga PMA-PNPA 93 mi-expire usab kaniadtong Abril 1, 2011. Basi kini sa memorandum nga giisyu sa Land Transportation Office (LTO) nga gipitsahan og Hunyo 15, 2010. Basi ra ba sa bag-ong lagda, daku kaayo ang multa niadtong mga mogamit og expired nga commemorative plate, ilabi na kun itabon kini sa orihinal nga plate numbers.
Ang Department of Transportation and Communications (DOTC) may gipagawas nga memorandum nga nag-amendar sa Administrative Order AHS-2008-013 kabahin sa paggamit og commemorative plates.
Ang lagda mao kini. “The commemorative plate shall not be used in place of the regular plate. As such, the display of the regular plate in the motor vehicle shall be maintained in the space provided for the purpose even during the period of use of a commemorative plate.”
Dugang pagpasabut sa memorandum. “Hence, the superimposition of the commemorative plate over the regular license plates is a clear violation of the aforecited provisions of law.”
Ang gipasabut nga balaud mao ang Section 18 sa Republic Act 4136, ang Transportation and Traffic Code.
Gilatid sa maong balaud nga “At all times, every motor vehicle shall display in conspicuous places, one in front and one in rear thereof, the said regular license plates.”
Unya daghan kaayo ang mga sakyanan nga mahimong pangdakpon kay hugaw kaayo ang ilang mga plate numbers, o kaha dilapidated na. Unsay gilatid sa balaud?
“The number plates shall be kept clean and cared for, and shall be firmly affixed to the motor vehicle in such a manner as will make it entirely visible and always legible.”
Alang niadtong mga wala makasabut, gitataw sa balaud nga ang mga plate numbers kinahanglang limpyo ug atimanon pirmi aron kanunay nga mabasa. Ang tinuod nalooy lang ang mga law enforcers nga modakop sa mga drayber nga wala intawon masayud sa balaud.
Unsaon, daghang mga drayber ang naantigohan mao ra g’yud ang pagpadagan sa sakyanan. Mao kini ang nakapait kay ang mga tag-iya’g sakyanan dili maantigo nga mo-require sa ilang mga drayber nga mo-undergo gayud og seminar.
Ako gani nga suheto na og gamay sa mga balaud sa pagmaneho og sakyanan mobasa pa man sa mga gilatid nga lagda ug kanunay pa nga motambong og mga seminar sa LTO.
Sayonan ka, ultimo uniporme nga ipasul-ob sa mga drayber dili motuman? Tabla ra sila nga hambugero kaayo. Unya kun madakpan hapit na lang mohilak sa pagpakilooy nga dili dakpon.
Bitaw, balikan nato kining mga tawo nga migamit pa og mga commemorative plates nga mga pinalit, ayaw gayud ninyo itabon sa orihinal nga plate numbers para dili kamo madakpan.
Gamay ra man hinoon ang multa kun madakpan mo, singko mil ra man. Aw anaa ra kaninyo kun mopatuo mo o dili pero ayaw lang panghangyo kun masakpan mo. Kun dili gud nato estriktohon ang pagpanakop karon, kanus-a man?