Uminto, palihug

Bisan og unsaon pa og hikuhiko sa mga sakop sa wage board sa Central Visayas, wa sila’y laing kapilian gawas sa pagtugot nga usbawan ang minimum nga suholan sa mga mamumuo sa Sugbo, Bohol, Negros Oriental ug Siquijor. Human nagkauyon ang mga sakop sa wage board sa National Capital Region (NCR) nga usbawan ang minimum nga suholan sa mga mamumuo sa Metro Manila, mapugos ang lokal nga wage board pagsunod kay:

Dako kaayo og labaw (P119) ang minimum nga suholan sa Metro Manila (P404) kay sa Central Visayas (P285); ug

Mas mahal og hangtod P8 matag litro ang presyo sa krudo ug gasolina sa Sugbo ug Central Visayas kun itandi sa Metro Manila.

***

Kun nakita sa NCR wage board ang panginahanglan pag-usbaw sa suholan sa ilang mga mamumuo nga nagdawat og mas dako nang daan og suholan ug nagpahimus sa mas ubos nga presyo sa lana, nganong hikawan man sa Central Visayas wage board og usbaw ang mga mamumuo nga nagdawat og mas gamay’ng suholan ug nagbayad og mas taas nga presyo sa lana?

Pasayloa nga nagtuyuk-tuyok ko. Gusto lang kong maneguro nga masabtan sa mga sakop sa lokal nga wage board ang kadako sa eskandalo nga mamugna kun, sama sa naandan, magpiyong na sab sila pagbasura sa bisan unsang usbaw sa suholan karong tuiga.

***

Laing hinungdan nganong di kabalibaran sa mga sakop sa wage board ang sibaw nga awhag sa usbaw sa suholan: Ang Malakanyang nahinayak na paghatag og financial subsidy alang sa PUJ ug tricycle drivers ug karon nangita og dugang tinubdan sa pundo aron kahatagan sab og hinabang ang mga mag-uuma ug mga mangingisda.

Pasanginlan ba sa lokal nga wage board nga nasayop ang palasyo sa pagpanalipod sa mga sektor nga direktang naigo sa way kinutoban nga pagsaka sa presyo sa lana? Sa di pa sila mangahas paghimo ana, angay silang pahinumdoman nga ang subsidy gipasiugdahan ni Presidente Noynoy Aquino. Nga, simbako wa sila kaila, maoy motudlo og puli kun magpakauwaw na sab pagluok sa interes sa mga anak sa singot.

***

Busa mahimo ba nga motimbakuwas nang mga sakop sa lokal nga wage board gikan sa ilang paghinanok sa mga panghitabo sa atong palibot? Mahimo bang mogawas na sa langob nga ilang gipuy-an ug atubangon ang di malalis nga kamatuoran nga ang mga mamumuo, nga maoy tinuod nga nagpalihok sa mga industriya ug sa nasudnong ekonomiya, nagkinahanglan og dinalian nga tabang?

Giawhag ni Labor Secretary Rosalinda Baldoz ang wage boards paghukom usbawan o ilansang bang minimum nga suholan sa di pang Mayo 1. Ang lokal nga wage board maoy nangiwit ug labing tihik sa nangaging katuigan. Hinaot nga ning higayona madutlan na sila sa kauwaw.

***

Email: [email protected]