Hilom nga aksiyon sa KSPC

Bisan karon lang giatiman sa mga tagdumala sa Korean Electric Power Corp. – Salcon Power Corp. (KSPC) ang mga mulo sa mga residente, malipay na lang kita nga aduna diay silay aksyon sa hilom nga paagi.

Migawas sa The Freeman kagahapon ang balita diin ang KSPC nagkanayon nga ang pagtarong sa tambakanan sa coal mao karon ang ilang prayoridad.

Gani sa maong taho, miduaw si Gob. Gwendolyn Garcia ug Mayor Valdemar Chiong sa KSPC aron itanyag ang ilang pagtabang pinaagi sa pagpadala sa ilang mga engineering units aron mapadali ang pag-contain sa mga abog-abog gikan sa coal.

Niadtong Domingo, naka-agi na usab ko og balik sa Kepco sa Naga sa dihang nagpaingon kami sa akong kauban sa Cebu Goat and Sheep Raisers Association, Inc. nga si Ed Durango ngadto sa Barili Goat Farm ni Ed Aguilar sa Mantayopan, Barili ug Princess Goat Farm ni Ildy Suerte sa Banhigan, Badian. Nakita nako ang blue nga luna (plastic sheet) nga gitabon sa coal yard sa KSPC.

Sumala pa sa atong “source” diha sa Naga, aduna diay mga “remedial measures” nga gihimo ang KSPC.

Mao usab kini ang nakasayop sa KSPC tungod kay wala usab sila magpahibalo ngadto sa komunidad unsay ilang gibuhat aron dili na mag-antos ang mga residente tungod sa mga abog-abog gikan sa coal.

Tungod kay ang komunidad sa palibot sa KSPC, mga environmentalista, mga ahensiya sa kagamhanan ug ang publiko nagbantay sa ilang mga kasaypanan, ang angay untang buhaton sa KSPC mao ang paghatag og advisory sa mga butang nga ilang gihimo nga makaapekto sa publiko.

Kay kanang paghimo og mga remedial measures aron dili na manggawas ang mga abog gikan sa coal usa man ka public concern, angay gyud unta nila kining ipahibalo aron dili magtuo ang publiko nga wala silay gihimo.

Pananglit aduna kamoy barko nga naabot nga puno sa coal, unya intensiyon diay sa KSPC management nga dili kini i-ariya (unload) paingon sa tambakanan mentras wala pa mataboni ang coal yard.

Angay gyud nga magsabasaba ang KSPC nga dili diay i-ariya ang mga coal aron ang mga tawo sa palibot dili mabalaka nga mabulit na usab og abog ang hangin nga ilang mahanggab.

Usa ka maayong progress sa siyudad sa Naga kining pagtagad gilayon sa mga tinugyanan sa KSPC sa maong suliran.

Kun importante alang kanato ang paglimpyo sa hangin sa palibot sa planta, importante usab nga maka-generate ang KSPC og 200 megawatt nga kuryente aron isuplay sa mga industriya sa Metro Cebu nga maoy nagpabuhi sa atong ekonomiya dinhi.

Kay matud pa ni Atty. Guillermo Dabbay, abogado sa KSPC, nga intensiyon sa maong kompaniya ang pagnegosyo og kuryente sa Sugbo sa taas nga panahon. Matud niya nga ang pagtagad sa panglawas ug maayong relasyon ngadto sa mga kaubang residente sa siyudad sa Naga ug lalawigan sa Sugbo dili lamang usa ka buhat sa maayong corporate citizen ug pagpanday og maayong reputasyon, apan usa kini ka buhat sa maayong negosyo.

Kanang pag-aksiyon sa problema nga dili isaba sa publiko, maayo man nga pamaagi sa pagdumala sa negosyo.

Apan maayo unta og mo-uyon nako si Atty. Dabbay sa akong panahom nga kun mo-apekto na gani sa publiko ang usa ka buhat o aksiyon, dili kini angay tago-tagoan. Sultian gyud nato ang publiko unsay maayo natong gipamuhat aron dili mogamot ang kabalaka sa mga tawo sa kasaypanan nga sa tago ato nang gikoreksiyonan.

* * *

Mao usab kini ang kaso ni Bise Gob. Gregorio Sanchez.

Daghan na ang kuryoso unsay nahitabo niya karon nga wala na siyay tungatunga sa mga sesyon sa Provincial Board sa lalawigan sa Sugbo.

Gani, nakapangutana na ang mga sakop sa hunta probinsiyal kun absent ba o on- leave si Sanchez karon nga wala na gyud siya mo-report sa iyang opisina sa Kapitolyo ug wala na usab siya mo-preside sa sesyon.

Sumala sa mga report nga si Sanchez nag-antos karon sa sakit sa baga. Apan iyang pag-umangkon, amigo nako nga kapitan sa barangay Busay nga si Yody “Okiyod” Sanchez, dili man mokonpirmar ug dili usab mo-deny nga adunay sakit nga gihambin ang buotang bise gobernador.

Sumala pa sa unconfirmed report, si Sanchez na-confined karon sa usa ka ospital sa Manila tungod sa seryoso nga sakit, dili lamang bronchopneumonia, nga usa ka sakit sa baga.

Apan alang kanako, kun angay masayod ang publiko sa kahimtang sa bise gobernador, angay usab natong hatagan og higayon ang iyang pamilya sa pagpatambal kaniya, dili samok-samokon sa pamolitikang mga pangutana.

Kitang tanan mahimo nga magkasakit. Suwerte lang tingale ang mga kauban niya sa Kapitolyo, ilabi na nilang Gob. Garcia ug mga kauban sa hunta probinsiyal kay wala mahatagi og ingon nga sakit sama ni Sanchez, kun tinuod man nga nasakit kini.

Dili lalim sa usa ka pamilya nga adunay sakop nga masakiton.

Busa dili makatawhanon sa mga kauban niya sa hunta probinsiyal ang pagpugos sa pamilyang Sanchez pagpatug-an sa tinuod niyang kahimtang.

Sa laing bahin, si Sanchez nakakuha man diay og travel order sa Office of the Governor sukad niadtong Marso 1 hangtod sa Abril 30, 2011. Unya na kita mokisikisi og pangutana sa kahimtang sa iyang panglawas kun mapupos na ang tagal sa iyang travel order.

Pilipino man kaha kita? Maayo kaayo kitang maluoy sa mga tawong dili gani nato kaila kun makakita kita sa ilang pag-antos.

Unya, kana hinuong atong kauban nga nag-antos sa sakit dili na hinuon kaluy-on?

Pagkawalay batasan!