Ang IBP ug ang mga hambogero

Nagbunga og dili maayong resulta ang gipahigayong piniliay alang sa bag-ong mga opisyal sa Integrated Bar of the Philippines (IBP) Cebu City Chapter. Ang ubang mga abogado nga sakop sa Cebu City Chapter buot nang mamalhin sa Province Chapter tungod kay naglagot sa hugaw ug dili maayo nga paagi sa pagpangampanya sa mga kandidato sa pagka opisyal sa ilang kahugpongan.

Atol sa piniliay adunay nagpakatap og papel nga nagtandi nila ni Atty. Ian Anthony Sapayan ug Atty. Earl Bonacheta, mga kandidato sa pagka presidente sa Integrated Bar of the Philippines Cebu City Chapter. Ang maong papel nagpakita nga si Atty. Sapayan gradwado lamang sa Southwestern University ug kaduha mokuha sa Bar Examination una pa makapasar samtang si Atty. Bonacheta gradwado sa University of San Carlos ug kausa lang mokuha sa Bar Exams.

Ang pagbutang sa papel sa mga kwalipikasyon sa mga kandidato maayo ug angayan lamang gayod aron masayod ang mga botanting sama kanila abogado apan ang pagbutang sa papel kun kapila mokuha sa Bar examination ang kandidato una pa kini makapasar foul ug below the belt tungod kay di kini sukdanan sa pagka maayo sa usa ka abogado. Ang mga abogado nga nagpakatap sa kontrobersiyal nga papel mga hambogero ug mabaw ang kahibaw kun hisgotan ang Code of Ethics sa ilang profession kay wa man sila makasunod niini.

Ang pagpasar sa Bar examination dili sukdanan sa pagka maayo sa usa ka abogado kun dili sukdanan lamang kini kun angayan na bang tugotan nga makapanglaban ang usa ka kandidato sa pagka abogado. Labaw na usab nga dili sukdanan sa pagka maayong pangulo sa kahugpongan ang pagpasar dayon sa Bar exams.

Ang pagkomparar sa mga law schools diin mogradwar ang abogado dili angayang ipanghambog tungod kay lahi-lahi ang ilang oryentasyon. Unsa kahay bation sa mga gradwado sa University of San Carlos College of Law kun akong banhawon karon ang ilang gikalagotan kaniadto. Nabaniog man ugod kaniadto nga ang mga abogado nga produkto sa USC pang opisina lang kay di kamao manglaban samtang ang mga abogado nga produkto sa Southwestern atoa kanunay sa hukmanan kay mga maayong manlalaban. Pero di na lang ta mosakay niining maong istorya kay wa ni maayong kapaingnan.