Janitor

Sa makausa pa nabisto ang dakong kakuwangan sa serbisyo sa mga district hospital sa lalawigan sa Sugbo dihang usa ka pasyente didto sa Bantayan District Hospital ang mireklamo tungod sa pag-ihi og dugo.

Ang pasyente nga si Astero Rivera, 68, unang mireklamo nga dili ka-ihi hinungdan nga gidala didto sa district hospital. Tungod sa kadaghan sa pasyente ug ka dyutay ra sa mga kawani sa tambalanan ang janitor sa tambalanan nga si Arturo Abello maoy giingong nag-atiman sa pasyente.

Si Abello mao say gisugo nga motaud sa catheter ngadto sa pasyente hinungdan nga wala magkadimao. Naka-ihi man tuod ang pasyente apan dugo maoy gipangihi niini. Ang mga doctor sa Don Vicente Sotto Memorial Medical Center nga niatiman sa pasyente unang gikutlo sa report nga nagkanayon nga ang wala magkadimao nga pagtaud sa catheter maoy hinungdan nga nangihi og dugo ang pasyente.

Ang report hinuon dali nga gihimakak sa kadagkuan sa VSMMC. Si Dr. Gerardo Aquino miingon, basi sa report, nga wala sila moluwat og pamahayag nga ang sayop nga pagtaud sa catheter maoy hinungdan sa pagpangihi og dugo sa pasyente.

Ang katin-awan gihimo sa VSMMC human masuko si Gobernador Gwendolyn Garcia sa nigawas nga report sa pamantalaan maylabot sa insidente. Labihan kunong sukoa ni Garcia tungod kay nabutang sa dili maayo ang imahin sa probinsiya sa nigawas nga report.

Ilang dali nga gihimakak nga janitor si Abello. Sigun pa sa Kapitolyo dili siya janitor kun dili “Institutional worker.” Sigun sa ilang pagpasabot ang “institutional worker” mao kadtong mga hospital aides kon katabang sa mga gimbuhaton sa tambalanan. Sa laktud all around workers, apan gibansay-bansay kuno sa paghimo og minor medical work.

Alang nako “play of words” ang gihimo sa Kapitolyo sa tuyo nga tabonan ang dakong kakuwangan sa atong mga district hospitals. Dili nalang nato ilisan og laing pangalan ang janitor.

Janitor man o institutional worker ang imong itawag ni Abello ang kamatuoran mao nga siya katabang lang sa tambalanan nga dili gyud unta maoy angayan nga mohimo sa trabaho sama sa pagtaud og catheter.

Dili sab angayang masuko si Gobernador Garcia ngadto sa mga sakop sa media nga mireport sa insidente. Inay media maoy iyang basulon, angayan tingali nga iyang tawgon ang atensiyon sa mga tagdumala sa tambalanan nganong ilang gitugotan nga si Abello maoy mohimo sa trabaho nga dili iya.

Mismong ang doctor didto sa district hospital miangkon nga si Abello utility worker sa tambalanan ug nahimong security guard nila. Wa may kwestiyon kun sila patabangon sa mga gimbuhaton pero ayaw nang mga trabaho nga mabutang sa peligro ang kinabuhi sa pasyente.

Ang maayong buhaton sa gobernador, inay masuko sa negatibo nga report, iyang dawaton ug himuon ang unsa may angayang buhaton. Unsa may buot mahitabo ni Garcia nga pulos dayeg ug abiba nalay himuon sa media ngadto sa iyang pamunoan?

* * *

[email protected]