Ang pag-resign ni Representante Ronald Singson gikan sa katungdanan usa ka dalaygon nga lakang tungod kay bisan usa siya ka tiggamitan og ginadiling drugas, may nahibilin pa diay’ng bahin sa iyang konsensya nga wa sanapi sa brutal nga epekto sa drugas ug sa kahakog.
O daghang nagtuo nga mahisama si Singson sa ubang mga opisyal nga di durogista pero, bisag gisantako na sa mga pagsaway sa katilingban gumikan sa di maayong pamaagi sa paghupot sa katungdanan apan hunit kaayo ug makigkamatay pa aron lang magpabilin sa katungdanan.
Hinuon sa bahin ni Singson, bisan pa kun wala siya moboluntaryo sa pagdemiter sa katungdanan, nagtuo sab ang mga Pilipino nga di makadawat ang iyang kaubanang magbabalaod nga magpabilin siya kauban nila sa kongreso.
Karon wala ta masayod kun wa bay ubang mga kongresista nga may bisyong susama ni Singson.
Apan kun anaa man ugaling, basta di lang kaayo ipaklaro niya ang iyang bisyo ug di makamansa sa katibuk-ang dungog sa kongreso aw kinsa bay masayod sa personal nga tinagoan sa usa ka tawo kun dili niya kini ipahibawo sa ubang tawo.
Pero gumikan kay ang paggamit sa ginadiling drugas di man gyud malilong , sa madugay ug sa madali, bisan unsaon niya og tago ang iyang kaugalingon , may higayon ra gihapong masayran siya sa tanan.
Sa bahin ni Singson, mahimong nalinlang niya ang katawhan nga mipili kaniya sa pagtuo nga kapiyalan ang iyang pagkatawo, uban sa maayong binuhatan ug kinaiya.
Apan ang pagka-inosente sa mga botante wala itugot nga makapalambo sa ambisyon ni Singson kay siya mismo sa iyang kaugalingon gibalinud sa dakong dimalas, kay siya ray nagbulgar sa tinuoray nga bulok sa iyang pagkatawo.
Kay daghang nagtuo nga kun wala siya hisakpi sa iyang bisyo, way nasayud kun di ba siya makakombinse og mga kaubanan niyang magbabalaod nga mosagop sa dautan niyang bisyo.
Ang illegal nga drugas, maoy magtukmod sa tawo aron mahimong criminal, manlugos, manulis ug tanang dautang bisyo mahimo kaayo tungod kay ang illegal nga drugas makapaway kahadlok sa tawo sa pagbuhat og linuog nga krimen. Di ba?