EDITORYAL - Ang pagbuto sa bombilya

Di tingali angayang basulon ang taga Cebu City Medical Center tungod sa pagbuto sa bombilya sulod   sa Pediatric Ward niini, ang lawak alang sa mga bag-ong matawo nga bata.

Kay ang maong hitabo , naggumikan sa ka-minus og kalidad sa maong bombilya nga gitaod sa maong lawak.

Husto ang ilang giingon nga usa gyud ka aksidente ang maong hitabo kay wala kadto tuyoa, gani sa kadaghang sugang dagitabnon ug mga bombilya sa maong tambalanan, wa man mamuto.

Kay kun naandan pang mamuto gyud ang mga bombilya sa maong tambalanan, di na tingale angayan pang butangan og suga ang maong lawak.

Kun karon lang masinatii sa mga kawani sa maong tambalanan ang maong hitabo, angayan tingale nilang hinuktokan kun asa sila mag-estalar og suga nga layo ra sa mga bata.

Apan mas maayo nga imbistigahon gyud sa buhatan sa mayor ug sa mga konsehal ang maong hitabo.

Sa matag dagko ug gagmay’ng hitabo dinhi diin nakataya ang katungdanan sa mga hepe sa departamento, maayo baya tingale nga manginlabot ang konseho, sama sa gibuhat sa kongreso, aron mapitol dayon ug di makapalabong sa unsa mang anomaliya ang mga opisyal sa kagamhanan nga naghunahuna na unta sa pag-abusar sa katungdanan.

O dako kaayo og papel ang mga konsehal sa pagpakanaog og imbistigasyon ni kinsa mang hepe sa usa ka departamento nga makahimo og lapso sa pagtuman niya sa katungdanan.

Kini aron nga wala nay mag-abusar sa ilang katungdanan ug ang matag usa kanunay nang magmatngon sa pagtuman sa katungdanan aron mogaan-gaan usab ang hunahuna sa mga magbubuhis nga dili na makadungog nianang kinilkilay diha sa City Hall

Hinuon wala kaayoy kasayoran ang publiko bahin sa mga anomalusong transaksyon nga gihimo sa ubang mga opisyal diha sa City Hall.

Ang baniog kaayong kusog mangilkil og kuwarta gikan sa mga magbubuhis mao man ang taga OBO, apan kaniadto ra kini , ambot kaha karon panid-I kuno ninyo.

Unya kun naa gyud ireport ngadto sa konsehal nga maoy nag-chair sa komite nga naggahum sa OBO. Di ba?