Laing suspek gitagoan sa kapolisan?
Usa ka babaye nga giingong dunay agawong langyaw diha sa dakbayan sa Naga ang giingong gisignit sa mga sakop sa bag-ong task force sa kapolisan nga nag-imbistigar sa pagdagit ug pagpatay sa 6-anyos nga si Ellah Joy Pique niadtong Pebrero 8 diha sa lungsod sa Minglanilla.
Ang gi-pick-up sa kapolisan niadtong Miyerkules sa hapon didto sa Balili Beach sa Barangay Tinaan dakbayan sa Naga mao si Felisa Sasan, 26, molupyo sa South Poblacion, Naga City.
Ang tinubdan sa Lintunganay nagkanayon nga si Sasan personal nga gikuha ni Sr. Supt. Patrocinio Comendador, hepe sa Regional Intelligence Division sa Police Regional Office-7.
Ang kadagkuan hinuon sa kapolisan kusganong nanghimakak nga duna silay gikustodiya nga posibling may nahibaw-an sa pagdagit ug pagpatay ni Pique. Si Sr. Supt. Louie Oppus, deputy regional director for operations sa PRO-7 ug sa samang higayon pangulo sa bag-ong task force, miingon nga dili tinuod nga duna silay gidakop o ba kaha gikustodiya.
Apan mihangyo sab siya sa samang higayon nga sabton sa media kun dunay mga impormasyon nga dili nila mamahimong itug-an. Taliwa sa pagpanghimakak sa mga opisyal sa kapolisan, ang mga ginikanan ni Sasan nga sila si Nerissa ug Feliciano mikumpirmar sa The Freeman kagahapon nga gikuha ang ilang anak sa kapolisan.
Ilang gitumbok ang Criminal Investigation and Detection Group-7 nga maoy nikuha sa ilang anak. Gani nagpauban sila sa team sa The Freeman kagahapon sa hapon didto sa buhatan sa CIDG aron pagsusi.
Apan nakawang ang ilang tuyo tungod kay ang mga opisyal sa CIDG-7 kusganon sab nga nanghimakak nga sila maoy nagkuha ni Sasan. Ang tinubdan hinuon sa Lintunganay miingon nga ang nikuha ni Sasan niadtong Miyerkules sa hapon mao si Comendador ug giingong gitugyan ni ngadto sa CIDG aron sa pagkuha sa affidavit.
Ambot unsa ka tinuod ang kasayuran nga gitug-an sa akong tinubdan nga si Sasan miangkon na sa iyang kalambigitan sa krimen? Sumala pa nga nakonsensiya na siya sa nahitabo.
Apan ang pangutana, hain man si Sasan karon? Gitagu-an kaha siya sa kapolisan? Dili imposible nga ila unang ihilom ang ilang pagdakop ni Sasan hangtud nga maresolbar ang kasong kidnapping with homicide nga unang gipasaka sa Cebu Provincial Police Office batok sa manag-uyab nga si Sven Erik Berger ug sa Filipina nga si Karen Castro Esdrelon.
Dako man gud nga kauwawan sa organisasyon sa kapolisan ang hitabo, tiaw mo duna pay nag-ung-ong nga kaso sa piskaliya apan duna nay laing suspetsado nga gidakop.
Apan hinaut nga dili ililong sa kapolisan ang tinuod ngadto sa publiko labaw sa tanan hinaut ilang respitohan ang tawhanong katungod sa usa ka suspetsado.
Si Sasan matud pa sa iyang ginikanan nagtrabaho sa usa ka videokihan diha sa dakbayan sa Naga ug giingong duna ni’y agawon nga langyaw. Matud hinuon sa mga ginikanan nga wala sila makakita ug makasiguro unsa ka tinuod ang maong kasayuran nga ila ra sab nga nahibaw-an gikan sa ilang mga silingan.
Si Sasan man gud duna na ni kapuyo nga taga South Poblacion apan giingong nahimulag kaniya human mabilanggo tungod sa kasong may kalambigitan sa illegal nga drugas.
* * *
- Latest
- Trending
