Paburot sa abang
Mikisi-kisi ang management sa JSU-PSU Mariners Court-Cebu tungod kay silay gibasol sa ubang mga kumentarista sa radyo nganong nangapasmo ang ubay-ubay’ng senior citizens atol sa Valentine’s Party nga gipasiugdahan sa Office of the Senior Citizens Affair kon OSCA sa dakbayan sa Sugbo.
Gihimo man gud nga lansis sa pangulo sa OSCA nga si Guillermo Casinillo ang mahal kuno nga abang sa venue sa ilang party hinungdan nga nahutdan sila’g budget alang sa pagkaon.
Ang unang pangangkon ni Casinillo mao nga P55,000 maoy ilang abang sa convention hall sa Mariners Court mao nga P45,000 nalay nahabilin sa P100,000 nga budget gikan sa City Hall.
Ang P45,000 gikuhaan sa gasto sa mga adorno ug suhol sa mga niadorno ingon man premyo sa King and Queen of Hearts nga ilang gipasiugdahan mao nga igo ra gyud ang ilang budget. Kini maoy hinungdan nga ila kunong gipasidan-an daan ang mga tiguwang nga manambong sa party pagpanihapon daan.
Apan daghan ang wala masayod, hinungdan nga ubay-ubay gyud ang napasmo. Nahilom na unta ang maong isyu, nituo na unta ang mga tiguwang nga kuwang gyud ang budget sa ilang party mao nga ila nalang gi-charge to experience ang nahitabo nila.
Apan di gyud buot ang kahigayonan nga magpabiling tinagu-an ang pagpaburot sa abang sa venue sa party tungod kay mismong ang management sa Mariners Court maoy mibuking sa pangangkon ni Casinillo.
Dili diay tinuod nga P55,000 ilang gibayran sa abang sa venue kun dili P18,000 ra ug gi-utang pa gyud. Hangtud niadtong Biyernes sa hapon wala pa gani mabayri ang Mariners Court sa P18,000 nga abang.
* * *
Apan sama sa sagad himuon sa mga tawo nga mabuking sa ilang pagpamakak, nangita dayon og lusot si Casinillo ug nakatag-on mo nga ang mga sakop sa media dayon maoy iyang gibasol.
Matud ni Casinillo nga dili kuno tinuod nga miingon siyang P55,000 ilang gibayran sa venue. Pastilan, wala pa man ko mabungol, nadunggan man gyud nako siya sa usa sa mga sibyaan sa radyo nga nihatag sa kwentada human mitumaw ang reklamo sa mga napasmo nga mga senior citizens.
Lab-as pa gyud sa akong pandungog nga iyang gihatag ang kwentada atol sa interview niya sa usa ka radyo nga P55,000 maoy ilang gibayran sa venue. Mr. Casinillo ayaw na intawon dugangi ang imong bakak. Gabaan baya ka sa mga tiguwang nga nangapasmo.
* * *
Akong kinasingkasing gipasalamatan si Kapitan Nunilon Monares sa Kalunasan tungod kay sa katapusan nadutlan ra gyud intawon siya og uwaw.
Gipalimpiyohan na niya niadtong Sabado ang nagbundo nga basura sa usa ka bakanteng luna dayong lugsong paingon sa Langub Shrine. Unya gipakapinan pa gyud niya og tapak ang daw sungkaan na nga karsada sa barangay.
Mahimo man lagi diay nimo kapitan, nganong kinahanglan man nimong paabuton nga latigohon ka og kumentaryo usa nimo himuon?
Hinaut magpabilin ang uwaw ug kaikog diha sa imong kaugalingon aron magpabiling limpiyo ang barangay.
* * *
- Latest
- Trending
