Aesop
Usa ka ihalas nga asno ang nakakita sa usa ka inatiman nga asno nga daghan kaayo og makaon ug anaa sa maayong kahimtang tungod kay dunay nag-atiman. Ang ihalas nga asno nipahalipay niini tungod sa maayong kapalaran. Apan paglabay sa pipila ka mga gutlo nakita sa maong ihalas nga asno nga gilatos ang maong inatiman nga asno sa nag-atiman niini. Ang ihalas nga asno nagkanayon: “Gibakwi ko ang akong pahalipay sanglit pag-antos man diay ang bugti sa imong kabusganan!”
Pamalandong
Dili tanang mga nindot ang magbunga og maayong linugdangan. Dunay mga mogawas nga nindot apan nagdala diay og kalaglagan.