Tungod sa baha nga miigo sa 13 ka mga barangay sulod sa Metro Cebu area gibasol ug gitudlo ni Bise Mayor Joy Young ang mga eskuwater nga maoy hinungdan niini. Unya kay tan-aw niya mga taga lalawigan man sa Sugbo ang mga eskuwater ning dakbayan, giawhag kini niya sa pagpamauli sa ilang probinsiya.
Pero yuna pa, ang mga eskuwater ba lang ugod ang nakaingon sa baha dinhi sa Sugbo? Sila ba lang ugod ang han-okan sa atong kagamhanan sa baha nga iyang natagamtaman? Ang atong gobyerno manghunaw na lang ba sa natampo usab niyang kapalpakan nga nakaingon usab sa baha?
Sa di pa manilhig sa uban kinahanglan nga silhigan una ni Bise Mayor Joy Young ug sa iyang kagamhanan ang kaugalingon niyang tugkaran. Di ikalimod nga nakatampo gayod sa baha ang mga eskuwater nga nagtukod sa ilang mga barong-barong sa daplin ug mismo sa kasapaan apan pila lamang kini sila ka porsyento.
Buta ka ba bise mayor kay wa nimo makita ang atong kabukiran nga nanga-upaw ug nangapahak kay gipangtupihan sa mga tag-iya og subdivision nga ganahang magtan-aw sa ilang ubos nga manglutaw? Di ba nangayo man og pagtugot sa lokal natong kagamhanan ang mga developer niining mga subdivision nga nanurok sa kabukiran ning dakbayan sa Sugbo? Ang mga kanal niining maong mga subdivision dagko ba ug diin ba tuod nila paagia? Eskuwater ba ang tag-iya ning dagkong mga subdivision ug ang mga nanimuyo niini? Sa laing bahin eskuwater ba ang nangoral sa Barangay Apas nga miresulta sa paglutaw sa mga panimalay ug pagpanglangoy sa mga tawong nanimuyo sa dapit nga gikoral?
Pagkalooy sa mga kabus nga nanimuyo sa mga eskuwater gipahimudsan gyod pagmaayo sa mga anaa sa katungdanan ug mga gamhanan. Magamit pa gani panggaon apan og dili na basura lamang sila sa panan-aw nila nga angayang ipaanod pag-apil sa baha kay sila ang hinungdan niini.
Ang baha dili lang mugna sa mga taga eskuwater kun dili mugna usab kini sa atong gobyernong naa ra sa tungod ang panan-aw ug walay taas nga panglantaw mahitungod sa mga posibling pagbaha. Ang atong kagamhanan dili lang unta motan-aw sa iyang tungod diin ang mga eskuwater lang ang iyang makit-an, mohangad usab unta siya ngadto sa unahan aron iyang makita ang nangaopaw nang kabukiran nga mas dako pa unyag ikatampo sa grabing mga pagbaha kun kini paundayonan.