Polis nga badlongon

Unsa may ikahulagway nimo sa tawo nga gitugyanan sa kagamhanan aron sa pagpatuman sa balaud apan siya utro pa nga badlongon?

Ang supervisor sa Land Transportation Office nga si Bimboy Arnaiz nakapanglingo-lingo g’yud dihang usa ka nagpaila nga polis sa Consolacion nasakpan nga nag-drive nga walay lisensya.

Atul sa operation sa LTO didto sa national highway sa Jagobiao, Mandaue kaniadtong Biyernes sa hapon hangtud sa gabii, nasakpan sa mga LTO agents ang usa ka tawo nga nag-drive og motor nga wala magsul-ob og crash helmet.

Gipahunong kini. Mipadaplin ra man hinoon ang maong tawo apan dihang gipangitaan sa iyang lisensya ug rehistro sa motor, wala g’yoy napakita.

Nagpaila kini nga mao si Eric Henry San Jose de Luna, nga usa ka polis sa Consolacion. Ang sticker sa iyang motor nga gimaneho nagpakita nga ang sakyanan narehistro pa kaniadtong 2007. Unsay ikasulti nimo sa mga polis nga ingon niini og batasan? Mag-drive og motor nga dili magsul-ob og crash helmet, usa ra ang side mirror sa motor, walay lisensya, ug walay rehistro ang sakyanan?

Makapaabut kaha og respito ang maong polis sa mga traffic enforcers diha sa Consolacion? Tingali mahadlok lang sila modakop sa maong tawo kay lagi polis man.

Apan kamong mga traffic enforcers diha sa Consolacion, ingon ba diay niana ang inyong kinaiya nga may pilion kamo sa pagpanakop? Giswerte lang ang maong polis kay tulo ka motorsiklo ang nasakpan nga walay lisensya ang nag-drive ug wala nay maka-drive niini pagdala sa LTO-regional office.

Kini maoy rason nga ang iya ra nga plate numbers maoy gisakmit, nagpasabut nga technical impound ang sakyanan.

Gipaningot ang maong polis sa pagtinangtang sa iyang plate numbers. Maayo unta og ang nasinati niadtong polis sa Consolacion himoong sanglitanan sa ubang polis.

Ang operation sa LTO gud lahi kay sa ubang mga traffic enforcers nga manakop nga daghan pa og hangyo-hangyo hangtud nga moabot sa binayranay.

Kaniadtong Huwebes, usa ka drayber og PUJ sa Talamban natudloan g’yud ug leksyon. Tiaw mo, migawas siya sa iyang linya diha sa Colon bisan og ang taliwala sa karsada dunay duha ka yellow nga badlis. Nagpasabot nga wala itugot ang paggawas ngadto sa pikas nga lane. Wala siya’y swerte kay ang LTO agent nga diha sa tarung nga linya iya mang gisugat.

Namatud-an nga ang maong drayber, si Narlan Kagacit, nadakpan na diay gani pagka Miyerkules tungod sa “Obstruction.” Sa ato pa, wala pa gani niya malukat ang iyang lisensya gikan sa LTO, mihimo na usab siya og abuso sa pagmaneho og sakyanan. Unsa ka nga matanga sa pagka driver?

Ang mga abusadong drayber susama ra niadtong mga tawo nga nakaangkon lang og lisensya nga pinalit. Walay hibangkaagan sa balaud sa pagmaneho’g sakyanan.

* * *

Isip pagtabang nako kaninyong mga drayber, siguroa lagi nga ang mga suga sa inyong sakyanan, atubangan ug sa luyo, kinahanglang magsiga g’yud panahon sa gabii.

 Ang LTO duna nay mga teams nga maglibot-libot sa dakbayan sa Sugbo panahon sa gabii ug manakop sa mga drayber nianang mga sakyanan nga kun magdagan daw mga lungon kay walay suga.

Kun ibaliwala ra gani ninyo ang akong tambag, ingna ko nga bakakon dili ba moabut ang adlaw nga madakpan ra mo. Malooy g’yud unta ang LTO nga manakop apan siguridad sa mga pasahero ang among ipatigbabaw. Lagmit kamo nga madisgrasya o makadisgrasya kun walay suga ang inyong sakyanan.