Naandan ni Cresencio Tañan, 32, nga mangisda sugod sa alas-2 sa kadlawon sa kadagatan sa Naga. Labi na sa mga buntag nga uwanon kay iyang nasinati nga daghan ang makuha nga isda. Bisan nagbunok na sang uwan, sama sa nangaging mga adlaw, namatikdan niya nga di na sama kangiob ang kadagatan, masaarong adlaw sa pagpalawod.
Apan wa siyang kabiya og sayo. Labihang sakita sa iyang tiyan. Nitokar na sab ang iyang ulcer. Human sa pila ka takna niyang lukuluko, igo gyud nga niamag nang banagbanag sa uwanon nga kadlawon, nilurang ang sakit. Sa hilom nagpasalamat sa kahitas-an nga makapangisda gyod siya. Nga gikinahanglan kaayo sa inadlaw nga panginabuhi sa ilang pamilya.
* * *
Igo lang siyang nakakuha og 11 ka tamarong, nakabantay siya og pumpboat nga nag-utaw-utaw nga way klarong tumong. Ang upat ka sakay niwarawara niya. Nagpatabang sila. Alas-6 na. Nagkakusog na sang uwan. Wa siyang kahibawo hangtod kanus-a siyang makapangisda. Kun modagko na sang bawod, wa siyay laing kapilian gawas sa pagdunggo ug pagpalabay sa laing nausik nga kahigayonan.
Gipili hinuon niya ang pagtabang nila. Nalunod na sab siya og kausa. Gilabaylabayan lang sa mga barko ug ubang pumpboats, kansang mga sakay posibleng wa kadungog ni kakita niya. Di siya gustong mahisama sila niya. Gituman niya ang ilang hangyo nga magpabira paingon sa Cansojong sa Talisay.
* * *
Ang pumpboat nga iyang naluwas gikan diay’ng naghatod og patay’ng lawas sa isla sa Pangapasan sa Tubigon, Bohol. Diin nibiya sila sa alas-9 sa buntag niadtong Huwebes ug gitakdang makadunggo na unta sa Cansojong sa alas-12 sa udto. Apan kay wa na man igkita hangtod pagka gabii, nidangop sila sa kadagkoan sa Talisay. Kinsa nipahibawo sab sa Coast Guard.
Apan Biyernes na lang sa buntag wa pay search and rescue operation nga gilusad ang Coast Guard. Sukwahi sa kapaspas ug kalapad sa ilang operasyon dihang nahanaw ang usa ka yate gikan sa Guam paingon sa Sugbo sa niaging semana. Maayo na lang nga wa moapil paglingiw si Tañan.
* * *
Way banda nga nisugat sa mga naluwas sa baybayon sa Cansojong. Apan ang init nga kahinangop sa mga paryente ug mga silingan nga nahingawa pag-ayo sa ilang pagkawagtang sud sa 21 ka takna, nakakumbinser ni Tañan nga wa siya masayop sa kasamtangang pagbiya sa iyang panginabuhi.
Mga nakapaminaw sa live coverage ni Marlon Bellita sa DYAB sa malipayong pagdunggo sa survivors nakaaghat sa mga tigpaminaw pagpasidungog ni Tañan. May nisugyot nga hatagan siya og kahimanan sa pangisda ug pa-eskuylahon ang iyang mga anak. Si Talisay City Vice Mayor Alan Bucao nisaad pagtabang pagpatambal sa sakit ni Tañan. Nga wa nang kadungog nila. Kay nidali pagbiya pagpadayon pagpamasin nga may nahibilin pang mga tamarong nga mosubad sa iyang subid.
* * *
Email:leo_lastimosa@abs-cbn.com