EDITORYAL - Hastang chorizo kagawon sab?

Makapakulba man kaayo kining revelasyon sa taga DOST nga ang giiksamen nilang mga chorizo sa merkado sa mga dakbayan sa Talisay, Cebu ug Mandaue pulos kagawon.

Kini labi pang nagpamatuod nga kun kagawon ang mga chorizo nga pinutos na, daw unsa pa kaha ang mga karne nga way putos ug maoy ampay sa mga langaw, abog ug uban pang hinungaw sa baho sulod sa kamerkadohang publiko.

Pagkamakaluluoy natong tanan nga sa panahong magnihit ang kuwarta wa intawoy madali si nanay para sud-ang ipabawon sa nag-eskuyla nga anak kundi chorizo.

Apan di lang baya mga kabus maoy mokaon og chorizo, kundi may mga adunahan usab nga mosuwa niini tungod sa kadaghan og lamas niini nga makapasamot sa iyang kahumot kun mainitan na sa kayo diha sa kaha.

Kaniadto ra ta makadungog nga kumo kay mga reject nga karne ang himoong chorizo, palamian kini sa daghang mga lamas aron malipat ang tawo unya di na maghunahuna unsang matanga sa karne ang chorizo kundi ang kalami niini maoy masinati.

Maikog baya ta mobutyag niini kay nagtuo ta nga mobahar ang halin sa atong mga negosyante og karne ilabi na ang mga negosyante og chorizo, apan di usab mahimo nga di nato ibutyag sa katawhan ang mga nadiskobre sa mga eksperto nga miiksamen sa mga sample sa karne ug chorizo gikan sa merkado publiko sa Talisay, Cebu ug Mandaue.

Kining ilang nadiskobrehan di usa ka panurambaw ngadto sa atong mga negosyante, kundi usa ka pasidaan ngadto sa publiko nga ang pagpatuyang sa pagkaon og karne ug chorizo di makaayo sa atong lawas. Di ba?