Makahilo nga chorizo

Tungod sa kabarato sa chorizo, nga mapalit sa kamerkadohan og tag P25 ngadto sa P35 ang dosena, labihang daghana nga mamalit. Bisan sa mga pasidaan nga hugaw ni, kay sama nga di luwas ang mga paagi sa pag-andam di sab limpiyo ang paghukas ini ngadto sa mga langaw samtang nagpaabot sa mga mamalitay, daghan gihapon ang mangita ug modugok.

Ambot tungod ba sa giisip nga talagsaong kalami, bisan kun may mga higayon nga mas aslom kay sa naandan, o tungod lang sa presyo nga labihang ubosa kun itandi sa ubang mas lab-as nga mga produkto sa karne, ang chorizo nahimong di na mawa nga tipik sa mga talad kan-anan ug mga barbekyuhan.

* * *

Kun nagkaon ka karon sa imong kinaham nga chorizo, palihog hutdang daan sa di pa ni nimo tiwason pagbasa. Kay ambot makatiwas pa ba, ug kuyaw nga akoy mabasol sa pagkawagtang sa imong gana pagkaon, kun mahibawo ka sa resulta sa laboratory examination sa mga chorizo sa labing dagkong kamerkadohan sa Metro Cebu.

Nakaplagan sa Regional Standards and Testing Laboratory sa Department of Science and Technology (DOST) pulos di luwas nga kan-on sa Sugbuanong mga konsumidor ang mga chorizo sa pito ka mamaligyaay sa Carbon ug Talamban sa Dakbayan sa Sugbo ug sa mga merkado publiko sa Talisay ug Mandaue.

* * *

Si DOST 7 Regional Director Rene Burt Llanto nipahibawo ni Kongresista Angelo Palmones sa Agham Partylist nga ang tanang chorizo samples positibo sa S. aureus (Staphylococcus aureus) ug ang mga chorizo gikan sa Talisay ug Mandaue positibo sa E. coli (Escherichia coli). Negatibo hinuon silang tanan sa salmonella.

 Matud ni Llanto ang mga chorizo napalit nila gikan sa pito ka mamaligyaay (duha sa Carbon, usa sa Talamban, duha sa Talisay ug duha sa Mandaue) gikan sa Enero 4, 10 ug 11 karong tuiga. Gipagawas sa laboratoryo ang resulta sa Enero 21. Gipahibawo ni Palmones ang resulta ngadto sa mga kongresista sa Sugbo niadtong Martes.

* * *

Ang E. coli maoy kagaw nga gikan sa hugaw sa tawo ug mga hayop. Ang resulta sa laboratory test nipalig-on sa pagduda nga gipatakaan lang ang paghimo sa chorizo, nga mahimong pan-os nang gigamit nga karne, wa matarong paghugas ang tinai ug nasagol na lang sa hugaw ug lapok sa merkado. Sa pikas nga bahin, ang S. aureus kagaw gikan sa tawo nga may sakit sa panit nga mahimong mosangpot sa food poisoning.

Ang findings sa DOST wa magpasabot nga makahilo ang tanang chorizo sa tanang mamaligyaay sa kamerkadohan sa Sugbo. Apan hinaot nga mahimo ning sukaranan sa dugang pakisusi sa kalidad ug kaluwas sa mga pagkaon nga gipamaligya sa kamerkadohan. Ug sa mas higpit nga pagpatuman sa mga lagda sa gobyerno.

* * *

 Email:[email protected]