Sa miaging Martes gipangbahaan ang Metro Cebu area dinhi sa Sugbo tungod sa kalit ug kusog kaayong uwan nga mibusdak gikan sa kalangitan. Sa dakbayan sa Sugbo adunay bata nga naanod sa baha ug patay na kining napalgan nga nag utaw-utaw sa kadagatan. Sa pagsuwat nako ning akong lindog wa pa upod igkita ang giingong babaye nga naanod usab sa dakbayan sa Mandaue samtang naluwas ang batang gamay nga gipakatulog sa duyan sa iyang mga ginikanan human malapawi sa tubig baha ang duyan.
Tungod sa kakusog sa bul-og ug kalawom sa baha sa dakbayan sa Mandaue nanglutaw gyod ang pipila ka mga appliances sa mga residente nga naigo sa baha. Apan si Mayor Jonas Cortes walay plano nga maghimo og dainage master plan nga maoy ilang sundon sa paghimo og daghang dagkong drainage. Wa kunoy sulod ang panudlanan sa Mandaue alang sa paghimo og mga kanal.
Pagkasubo palandungon nga ang dakbayan sa Mandaue walay gahin alang sa paghimo o pagtukod og mga kanal aron dili mabahaan ang iyang katawhan. Kun wa ko malimot gisugdan na kaniadto ni Mayor Teddy Ouano nga karon bokal na sa sixto distrito ang paghimo og dagko nga mga kanal aron matubag ang suliran sa baha sa dakbayan sa Mandaue apan wa kini matiwas tungod kay si Mayor Jonas Cortes ang midaug nianang pagkasunod piniliay. Wa usab ipadayon ni Mayor Cortes ang nasugdan nang programa ni Mayor Teddy Ouano seguro tungod kay nahadlok kini nga adto mapunta ni Teddy ang kredito sa proyekto ug dili ngadto kaniya.
Sa iyang pagka malamboon, way gahin o pundo alang sa kanal ang dakbayan sa Mandaue? Ngano gani panahon sa piniliay magbaha man ang kuwarta sa kagamhanan ni Mayor Cortes sa paghimo og mga kanal? Kun wa ko masayop nag-ilog pa sila si kanhi kongresista Soon Ruiz ug Jonas Cortes sa paglungag og mga kanal sa usa ka dapit diha sa Mandaue. Karon nga wa pay piniliay way kuwarta ang dakbayan alang sa paghimo og mga kanal? Pagkalooy sa mga Mandauehanon. Kay karon ting-uwan man pag agwanta lang sa mo, panglangoy lang sa mo.