• Nagmalampusong kasaulogan sa Sinulog karong tuiga tungod sa pagdagsa sa libuan ka mga tawo gikan sa bisan asang bahin sa kalibutan. Lampos ‘sab ang tinguha sa simbahan nga di’ kalimtan ang relihiyosong aspeto sa piyesta Senyor tungod kay wa’ kalimti sa mga tawo ang pagdagkot og kandila ug pagsalmot sa mga misa sa Basilica del Sto. Niño.
• Nakatabang ‘sab og dako ang mga partisipante sa Sinulog gikan pa sa lain laing bahin sa nasud. Tuyo silang migasto ug mianhi sa Sugbo di’ lang aron sa pagdaog sa festival apan sa pagpadayag sa ilang pag-ampo ug debosyon ni Senyor Sto. Niño.
• Wa’y makalupig sa debosyon nga gipakita sa mga tawo tungod kay luyo sa bunok sa uwan, gidumog gihapon sa mga deboto ang aspetong relihiyoso sa piyesta sa batang Hesus. Ang pagpakita sa mga tawo sa ilang pagtuo sa milagrosong bata, mao ang tinuod ug mahinungdanon nga diwa sa piyesta.
• Di’ sayon ang pagmontar sa labing dako nga festival sa nasud nga gikinahanglan nga ipahimutang ang tanan aron nga mamahimong mabulokon ang tanan di’ lang sa turista nga tuyong niduaw sa Sugbo apan alang kang Senyor Sto. Niño nga maoy tinubdan sa selebrasyon.
• Palpak ang PAG-ASA sa ilang weather update nga dili uwanon ang Sinulog tungod kay mas daghan pa gyud hinuon ang uwan itandi sa maayong panahon. Matod sa PAG-ASA, 10% lang kahigayonan sa pag-uwan apan basa ang kadalanan ug basa ang nakaligo sa uwan ang mga tawo tungod sa kusog nga bunok sa uwan.
• Apan dakong palpak ang dugay nga pagsugod sa Sinulog grand parade tungod kay gipaabot pa si Presidente Noynoy Aquino nga maoy pinasidunggan nga dinapit sa labing dakong piyesta. Kung sa mga miaging tuig naandan na ang pagsugod sa parada human sa misa, karong tuiga pasado alas dies na sa buntag tungod kay gipaabot ang presidente una buksan ang parada. Wa’ man siguro gipangayo sa Malacanang nga paabuton ang presidente apan pagpa-sipsip lang gyud siguro ang gihimo sa lokal nga kagamhanan.
• Palpak ang taga Presidential Security Group sa ilang pagpanghilabot sa seguridad sa Cebu City Sports Center tungod sa presensya ni Presidente Noynoy Aquino. Kung kanus-a nikompirmar ang presensya sa presidente, mao pa’y pagkisi-kisi sa taga PSG ug nangilog sa mga pulis nga maoy nagplano sa seguridad su’d na sa pipila ka buwan.
• Palpak ang taga PSG sa grabeng pagsukit-sukit sa mga tawo nga mosu’d sa sports center. Gipangkompiskar ang mga ballpen, gipa-ablihan ang mga laptop. Madawat pa na sa publiko ang tanan. Apan kung ang kutsara ug tinidor sa mga pamilya nga dala sa ilang bawon ang giingon gipangkuha sa taga PSG tungod kay hulga ni sa seguridad sa presidente, di’ na ‘sab na maayo. Mas maayo kung gitan-aw ug gi-respeto sa taga Malacanang ang lokal nga tradisyon ug dili ipatigbabaw ang ilang ngipon nga maoy nakaguba sa gipangandaman nga seguridad.
* * *
Email: rico_lucena@abs-cbn.com or ricolucena@yahoo.com