Gutom
Ang labing awahi nga survey sa Social Weather Station nagpakita nga nagkadaghan ang mga Pamilyang Pinoy nga gigutom upat ka buwan human molingkod sa katungdanan si Presidente Benigno Noynoy Aquino III.
Matud sa survey nga gibana-banang 3.4 milyones ka pamilya ang nakasinati og gutom sulod sa milabay nga tulo ka buwan sa wala pa himua ang survey niadtong Nobyembre 27 hangtud sa 30 sa miaging tuig.
Sa ato pa nga sukad sa Septembre sa miaging tuig hangtud sa paghimo sa survey 3.4 ka pamilya ang way gikaon o dili hapit makakaon sa matag adlaw. Kun sa usa ka pamilya dunay average nga unom ka membro sa ato pa moabot sa kapin sa 20 milyones ka mga individual ang gipanggutom dinhi sa nasud.
Ang maong gidaghanon nisaka hangtud sa 18.1 porsiento kun itandi sa 15.9 porsiento lang niadtong Septembre.
Ang Malakanyang wa matandog sa resulta sa survey tungod kay malaumon kini nga mokunhod ang maong gidaghanon sa higayon nga mapatuman na niini ang conditional cash transfer program nga mokantidad og P21 bilyones.
Ang conditional cash transfer usa ni sa programa sa gobyerno pinaagi sa Department of Social Welfare and Development diin hatagan og subsidy ang kabus nga mga pamilya og dili mo minus sa P1,200 matag buwan isip subsidy.
Samtang sayo pa aron basolon si Presidente Aquino niini kuwang sab ko sa pagtuo sa pagarpar sa Malakanyang nga mokunhod na ang gidaghanon sa mga gigutom sa higayon nga mapatuman na ang maong programa nga gitawag og 4Ps kun Pantawid Pamilyang Pilipino Program.
Kini tungod kay dili bag-o ang maong programa igo lang ning gisunod ni Aquino gikan sa miaging administrasyon. Gipadak-an hinuon ang gahin apan dili gihapon ni garantiya nga sa mosunod nga unom ka tuig sa pamunoan ni Aquino wa nay pamilyang magutman dinhi sa nasud.
Sa tinuod lang kuwang ko sa pagtuo nga ang pagpanghatag og cash assistance sa mga kabus maoy sulbad sa kawad-on. Bisan unsaon sa atong gobyerno paglawog ang mga kabus wa gyuy alibyo ang ilang panginabuhi kun sila mismo way ambisyon nga moasenso.
Dili igo ang hinabang gikan sa atong gobyerno, busa ang labaw’ng gikinahanglan aron moasenso sa usa ka pamilya mao ang kakugi sa matag membro niini. Dili kakugi sa pagpadaghan sa membro sa pamilya kun dili kakugi sa pagpangita sa tingusbawan.
Mapungot kaayo kung maminaw nga dunay mga tawo nga pwerte nga makasaway sa gobyerno tungod sa kalisod nga ilang nasinati. Samtang tinuod mag-agad sa abilidad sa atong gobyerno ang ekonomiya sa nasud, apan dili sab tingali gobyerno nalang sab gyud maoy basulon kun wa kay malung-ag sa inyong pinuy-anan.
Kun misaka man ang gidaghanon sa mga tawong gigutom kana tungod kay tingali wala sila maningkamot nga dunay malung-ag. Kun magkugi lang ang tawo dili gyud tingali mahitabo nga moabot ang punto nga kausa o kaduha nalang ka mokaon sa usa ka adlaw.
* * *
- Latest
- Trending
