Ang dagat ug ang mananagat

Usa ka marine watchman sa Cordova, Cebu ang gituohang gipatay sa iyang mga dinakpan nga duha ka mananagat nga taga Pook dakbayan sa Talisay. Samtang maoy gisangonan sa pagkuyog sa duha nila ka mga dinakpan kay gigukod sa iyang mga kauban ang lain pang mananagat nga nakasibat, wa na mahiabot sa baybayon sa Cordova si Rudy Sultan.

 Sa dihang gipangita, ang sakyanan na lamang sa duha ka dinakpang mananagat ang nakit-an nga nakadunggo sa lapyahan sa Pook, Talisay pero wala si Rudy Sultan ug ang mga dinakpan nga iyang gikuyogan nga sila si Dongcoy Yongco ug Luis Fernandez.

Nakita sa sakyanan ang lama sa dugo sa tawo.

 Ang mga kauban ni Rudy Sultan nagtoo nga ang naulahi gitambog sa dagat sa iyang gikuyogan nga dinakpan. Tuod man nakit-an ang patay’ng lawas ni Sultan sa tunga-tungang bahin sa kadagatan sa Cordova ug dakbayan sa Sugbo nga adunay tinigbasan sa iyang lawas.

Ang mga suspetsado hugot nga nanghimakak sa pasangil batok kanila. Ilang giasoy sa Super Radyo nga nahagbong lamang si Sultan dihang nag ilogay sila ug si Luis Fernandez sa armas.

Nganong gipatay man si Rudy Sultan? Tungod ba kay siya marine watchman? Sala ba diay ang pagka magbalantay ni Sultan sa kadagatan sa Cordova? Isip marine watchman trabaho ni Sultan ang pagpanalipod sa kadagatan sa Cordova batok niadtong mga mananagat nga mogamit sa mga ginadili nga matang sa panagat aron mapanalipdan ang mga isda nga naghatag og kinabuhi sa mga mananagat sa ilang lungsod. Apan gipatay siya ug ang gidudahan nga naghimo sa krimin mga mananagat.

Ang mga marine watchmen dapat panggaon, dili pamatyon sa mga mananagat kansang interest maoy ilang gipanalipdan. Angayang masayran ug masabtan sa mga mananagat kun hangtod karon wa pa nila masayri ug masabti nga sumpay sa kinabuhi sa mga mananagat ang dagat. Sa mga tawo nga nabuhi sa abot sa dagat dapat sila mismo ang manguna sa pagpanalipod tungod kay naa sila mabuhi niini.