Di na mabangbang ang maot nga isyu nga mihamok sa eleksyon sa mga batan-on karong panahona gikan sa pagpili og mga opisyal sa barangay hangtod na sa pagpili og presidente sa ilang federasyon.
Maoy hinungdan nga mitumaw ang mga suhestiyon nga kun mahimo mas maayong wagtangon nalang ang maong kalihokan, ug pasagdan nga ang mga hamtong nga mga opisyal sa barangay maoy magdumala sa mga kalihokan sa mga batan-on diha sa barangay.
Apan sa bahin usab ni Regional Director Pedro Noval sa DILG7, nga mas maayong ipadayon ang pagbutang og mga opisyal sa mga kabataan diha sa barangay apan pinaagi sa piniliay nga dili salmotan sa mga ginikanan ug mga politikong korapsu.
Kay ang mga korapsu nga ginikanan ug politiko maoy naghatag og mansa sa limpyong kaisipan sa mga batan-on kinsa angay pa untang mahimong inosente sa mga hugaw nga pamaagi sa politika.
Sa pagpamalit og boto, diha nimo makita nga ang usa ka ginikanan nga nagpasiugda niini nagpakita lamang nga di kapiyalan ang iyang anak busa walay mobotar niini kun dili sila mamayad og botante.
Kay ang usa ka batan-on nga buotan diha sa ilang barangay, nailhan sa katilingban nga may maayo og taras ug kinaiya, may liderato, ug may maayong dungog ang iyang pamilya.
Kun ingon niini ang matang sa magpapili, bisan ang mga ginikanan sa mga pumipili, makagiya sa ilang mga anak aron pilion ang labing buotan, may hiantigohan ug may lideratong batan-on sa ilang dapit.
Kining gibuhat karon sa mga ginikanan o si kinsa mang mga politiko nga nagpasiugda sa hugaw nga matang sa piniliay sa mga kabataan, nagtataw lamang nga gigiyahan nila ang mga batan-on nga mahimong labing korapsu nga mga politico sa umaabot nga mga adlaw.
Ang pagpamalit og boto usa ka hugaw nga matang sa pamolitika ug mao na kini ang hiyas ug kinaiya sa umaabot nga grupo sa mga politico.
Kini tungod kay gibaid nang daan sa mga tang-an ug korapsu nga mga ginikanan ug mga politiko ang mga kabataan aron pag-abot sa adlaw kun sila nay magdumala sa katilingban dili na sila hilupigan ug hibintahaan sa pagka-mangtas na sa pagsagop og ngil-ad nga matang sa pamolitika. Di ba?