Dunay ubang tawo nga moingon nga kining paggamit og commemorative plates sa mga tag-iya og sakyanan nga nagdala sa marka nga PNP, PMA ug uban pa hinambugero kuno.
Ako hinoon dili lang moapil sa pag-ingon nga hambugero ang maong mga tag-iya sa sakyanan kay wala may balaud nga nagdili kanila nga mogamit og commemorative plates.
Apan kinahanglan nga kun unsa ang lagda sa paggamit og commemorative plates ilang sundon aron dili sila madakpan ug makabayad og daku kaayong multa.
Sa laktud, ang commemorative plates mahimong gamiton apan dili kini kay maoy ipuli sa original plate numbers sa sakyanan diha sa pangunahan nga bahin.
Ang Memorandum Circular nga giisyu sa Department of Transportation and Communication (DOTC) naglatid g’yud sa tukma nga paggamit og commemorative plates.
“The superimposition of the commemorative plate over the regular license plates is a clear violation of Section 18 of Republic Act 4136, the Transportation and Traffic Code.”
Unsa may gilatid sa maong balaud? “At all times, every motor vehicle shall display in conspicuous places, one in front and one in the rear thereof, the said license number plates.”
Duna pay gipakapin. “The number plates shall be kept clean and cared for, and shall be firmly affixed to the motor vehicle in such a manner as will make it entirely visible and always legible.”
Gituyo ko kini tungod kay dunay kamandoan nga usa kini sa hugtan pagpatuman sa mga sakop sa Land Transportation Office (LTO).
Daku man gud kaayo ang multa kun masakpan kamo nga motabon sa orihinal ninyo nga license plate sa mga commemorative plate. Aw hinoon mga datu man usab ang mga tag-iya niining mga sakyanan.
* * *
Nakadungog ko nga duna g’yud diay kuno’y mga traffic enforcers nga nagdawatan og suborno gikan sa mga drayber sa mga PUJ nga nagbiyahean sa Mandaue aron dili sila dakpon nga mamasahero dinhi sa dakbayan.
Wala na kaayo ko masurpresa pagkadungog sa maong balita kay dugay na akong nagduda nga ingon niini g’yud ang nahitabo.
Ambot unsang matanga sa pagka traffic enforcer kining mga tawhana. Kun ako ang nahimutang sa ilang dapit dili ko makaagwanta nga kataw-an lang sa mga drayber.
Unya gidayeg nako si Mayor Michael Rama kay ang iyang baruganan itugyan niya sa Konseho sa Dakbayan kun unsay himoon sa hangyo sa mga opisyal sa Mandaue nga dili lang dakpon ang mga PUJ nga nagbiyahe sa ilang dakbayan.
* * *
Ang argumento sa usa ka opisyal sa Mandaue nga sila kuno mitugot man usab nga ang mga PUJ nga nagbiyahe sa dakbayan sa Sugbo makasulod sa ilang dapit paingon sa North Bus Terminal diha sa barangay Subangdaku.
Lahi nga sitwasyon ang imong gibasihan Sir. Ang inyong terminal building gipaabangan ninyo sa dakbayan sa Sugbo.
Apan kun maghimo kamo og ordinansa nga did-an usab ang mga PUJ sa Cebu City nga makasulod sa inyong teritoryo, walay problema.
Apan lahi ang inyong argumento Sir. Ang mga Mandaue-bound PUJ’s wala man did-i nga mosulod sa dakbayan apan kutob ra diha sa mga accredited terminals sa SM City ug Ayala.
Kay ngano ang mga PUJ sa dakbayan sa Sugbo namasahero ba diha sa downtown sa Mandaue?
Ang tumong gud nga did-an ang tanang mga public utility vehicles nga namasahero sa gawas sa dakbayan pagsulod ug pagpamasahero dinhi sa downtown, mao nga makamugna kini og grabeng traffic congestion.