09062514223 cell number sa mangingilad (Una sa duha ka hugna)

Kaniadtong Biyernes duha ka lokal tourist ang miabot sa DySS ug nagpakitabang sa akong programa tungod kay nahabilin sa taxi nga ilang gisakyan ang ilang Casio digital camera nga dala. Bisan og naka-hook-up pa sa 24 oras nga Newscast sa GMA ang akong tulumanong Saksi Evening Edition akong gitagad ang duha ka lokal tourist nga taga Manila tungod kay nakita nako sa ilang panagway ang kaguol. Jay ug Cathy diay ang ilang pangalan. Di ko lang itug-an ang ilang apelyedo para sa ilang seguridad kay ania pa ra ba sila dinhi sa Sugbo.

Sa akong interview giasoy sa duha nga misakay sila og taxi gikan sa may Fuente Osmeña ug nagpahatod sa CNT lechon sa SM City mga ala una ngadto sa ala una y media sa hapon kaniadtong adlaw nga Biyernes petsa 20 ning buwana. Uwahi na nilang nasayran nga nahabilin diay sa taxi nga ilang gisakyan ang ilang mahalon nga digital cam.

Matud pa sa duha nga importante kaayo kanila ang digicam tungod kay aduna kini sentimental value maong di sila ma-enjoy sa ilang pagbakasyon dinhi sa Sugbo kay ang ilang huna-huna atoa ra sa ilang butang nga nawagtang busa ila kining gipapanawagan tungod kay naminaw sa DySS ang taxi nga ilang gisakyan sa pamasin nga mauli ra kanila ang ilang digicam.

Sa ilang panawagan ilang gihatag ang ilang mga cell number aron dali ra silang makontak sa taxi driver o ba kaha sa pasahero nga nakapuli nila og sakay ug maoy nakahipos sa kamera. Ang ilang panawagan among gibalik-balik sa kahanginan.

Kaniadtong Domingo sa buntag nanawag kanako si Jay ug nagpahibalo nga adunay usa ka Roberto nga nag-text ug nanawag kaniya ug nagpahibalo nga atoa kaniya ang ilang digital camera. Gipauli kini kaniya sa usa ka taxi driver. Si Roberto gusto nga makigkita kanila sa Robinsons pagka alas nueve sa buntag kaniadtong Domingo pero tungod kay didto na sila sa Bohol ila kining gihangyo nga sa pagka alas onse na lang sila magkita. Si Roberto nangayo kaniya og load. Gitambagan nako si Jay nga didto na lang sila magkita sa DySS paglikay sa mga mangingilad.

Mga pasado alas onse sa buntag nag-txt nako si Jay kay mihangyo nga magpakuyog og police para sa ilang seguridad tungod kay gisultihan sila ni Roberto nga daghan usab ang mi-angkon sa camera. (Sumpayan pa)