Andam nang Halad

Nahingpit nang pangandam alang sa Grand Halad sa Kapamilya, ang labing dakong piyesta sa libreng mga pangalagad, tibuok adlaw karong Sabado, Nobyembre 20, sa Mabolo Elementary School, M. J. Cuenco Avenue, Dakbayan sa Sugbo. Sa sinugdanan, gidak-an ra mi sa luna. Karon, naproblema na mi asa ipahimutang ang mga pangalagad nga gitanyag sa manggihatagong kahugpongan sa gobyerno ug pribadong sektor. Ang sentro sa kalihokan mao ang kaliboan sa labing kabos nga mga pasyente. Nga maoy gipahinungdan sa labing dakong gastohan sa Halad, ang libreng mga tambal nga tampo sa Sagip Kapamilya Foundation (P250,000), The Freeman Foundation (usa ka kahon), 71 Dreams Foundation (siyam ka kahon) ug Department of Health (P22,536.50).

* * *

Moalagad nila ang mga doktor gikan sa Cebu City Medical Center (labing menos 10), Cebu City Health Department (labing menos 10), Jesu Christi Community (lima) ug Philippine Gospel Association (upat ka doktor ug upat ka dentista); ug nursing students sa University of the Visayas (60) ug University of Cebu (25). Uban nilang kapahimuslan: Libreng ibot sa ngipon; libreng minor surgeries; chest x-ray sa Hi-Precision Diagnostics ug Reactive Laboratory; ECG ug pulmonary test sa Agham Party-list; reading eyeglasses gikan sa Lion’s Medical Eye Bank, Fernandez Eye Clinic ug Agham Party-list; libreng legal ug notarial services sa IBP Cebu Chapter; libreng masahe (IPI ug Bright Path), reflex (St. Joseph Reflexologists) ug tupi (Naval Forces Central) ug libeng ayo sa PC ug cellphones (Tesda).

* * *

Kabahin sab sa Halad ang Kapamilya Blood Donation Campaign sa Chong Hua Hospital (CBC, Blood Type, Malaria, Syphylis, Hepa B, Hepa C, HIV, Hepa B DNA, Hepa C DNA, HIV RNA, FBS ug Cholesterol); Visayas Community Medical Center, Perpetual Succor Hospital, Mabolo Elem. School (uban sa Cebu City Medical Center) ug Gaisano Fiesta Mall sa Tabunok, Talisay City (uban sa Philippine National Red Cross). Himuon sab ang Job Fair ug Job Search sa Department of Manpower Development and Placement sa Guba ug Mabolo sa Dakbayan sa Sugbo; one stop shop sa DFA (passport applications evaluation), Pagibig (housing loan seminar), NSO, PhilHealth (MDR processing), SSS ug NBI (clearance processing).

* * *

Libreng seminars: Paghimo’g business plan uban ang P100,000 nga puhonan sa Kapamilya Negosyo Na!; pagpatubo sa gagmay’ng negosyo (Filipino Cebuano Business Club); pagtudlo (DepEd); security guards (Padpao); organic farming (uban nilang Bise Gobernador Greg Sanchez sa Lacto Pafi, Barangay Kapitan Leo Jabas sa Canduman, Mandaue ug Bio-Solutions Inc.) ug malunggay processing (uban sa Organic Asia Inc.). Manudlo unsaon pagluto og mga putahe sa kamunggay ang Cebu Technological University (CTU), magpakita og rescue operations ang kabomberohan, mangapon ug mamurga og iro ug iring si Cebu City Veterinarian Dr. Alice Utlang ug manghatag og 1,000 ka punoan sa nangka ang munisipyo sa Liloan.

* * *

Email: [email protected]