EDITORYAL - Clinton midayeg sa Filipino

Puwerting lipaya sa mga anti-RH Bill dihang gidayeg ni kanhi Presidente Bill Clinton sa Estados Unidos ang mga Filipino gumikan sa kapaspas sa produksyon sa bata niini.

Usa sa hapin ni Clinton , mao nga tukma ra kuno kaayo nga paburoton pag-ayo sa mga Pilipino ang populasyon sa nasud tungod sa kabahandianon sa Pilipinas sa natural nga rekurso.

Busa walay angayang kabalak-an ang mga anti-RH Bill kay maaprobahan man ug dili ang RH Bill, naka-program naman ang utok sa mga Pilipino, nga kinahanglang mopadaghan gyud sa mga anak agi og pagsunod ug pagtamod sa awhag ug mando sa mga tinahod nga mga kadagkoan sa simbahang Katoliko.

Unya dako usab og pagsalig ang katawhan, nga pinaagi sa kadagkoan sa simbahan nga maoy nagtukmod sa daghang pamilya nga magpadayon gyud sa pagpanganak basta aduna pay ikabuga ang lawas, maniobrahon nila ang ekonomiya sa nasud aron may husto kining rekurso nga ikapakaon sa magtubo unya nga populasyon dinhi.

Sumala sa estatistika sa Commission on Population matag tuig moprodukto ang Pilipinas og tag duha ka milyon ka mga bata.

Niining gidaghanona, sumala pa ni Clinton, dili kini makatibhang sa kaabunda sa natural resources sa Pilipinas .

Gumikan sa maong pamahayag ni Clinton misuliyaw sa kalipay ang mga anti-RH Bill tungod kay nakakita sila og lig-on supporter, nga mao ang kanhi Presidente sa USA.

Basin usab tingale nga ang mga proponent ra sa RH Bill maoy gilisdan sa kahimtang karon sa ekonomiya sa nasud ug ang anti-RH wala sila makakita niini.

Tingale , ang utang sa nasud nga kapin nang usa ka trilyon ka pesos, gituohan nilang dili kini maghatag og negatibong epekto sa ekonomiya sa Pilipinas.

Busa bisan pa kun moabot ang populasyon sa Pilipinas og 200 milyones sa umaabot nga siglo, magpabiling bahandianon ang nasud sa mga rekurso, ug gani mas maayo nalang nga anhi magpakabuhi ang tanan ug dili na angayan pang manglangyaw sa ubang nasud kay nia ra man diay ang greener pasture dinhi.

Mao ba pre?