Ang pungko-pungko ug tong kolektor

Basi sa balita gireklamo ni Doroteo Salazar ang mga manindahay og pungko-pungko. Giawhag ni Salazar ang CITOM nga wagtangon ang nahisgutang negosyo tungod kay nakabalda kuno kini sa trapiko sa kadalanan. Tinood ba ugod nga nakabalda sa trapiko ang mga pungko-pungko?

Kun ang akong nakita ang akong basihan, wa makabalda sa dagan sa trapiko ang pungko-pungko tungod kay wa sila sa dalan mamaligya kun may nakabalda man sa trapiko kana mao ang mga sakyanan nga gitugotan sa kagamhanan sa Sugbo nga makaparking sa kadalanan.

Ang pagkabalda gyod kaha sa dagan sa trapiko ang hinungdan sa pagreklamo ni Dodo Salazar o ang paghinay sa negosyo sulod sa mga tunghaan?

Daghan naman ugod ang mangaon og pungko-pungko tungod kay maabot sa mga tinun-an ang prisyo niini dili parihas sa mga tinda sa sulod sa tunghaan nga dolyar ang prisyo. Kun magkalisod makakaon man ugod og diyes pesos ang tinun-an sa mga pungko-pungko.   

* * *

Ambot og gihimo na bang legal sa dakbayan sa Sugbo ang pagpangolekta og tong diha sa may dalan Colon. Kana gumikan kay kada gabii man gyod nga kolektahan og tong ang mga drivers nga moagi sa maong dalan. Bisan sa kabantang sa gihimo niining mga tawong nangolekta og tong wa gyoy police nga misita kanila maong ako ug ang uban nagtoo nga legal na ang nahisgutang pagpangolekta.

Kun wa man gani itugot sa dakbayan sa Sugbo ang gihimo ning mga tawo nga maoy gihimong puhonan sa pagpangwarta ang ilang patik ug kaisog mas maayo segurong mahipos na ni sila kay nagdala lang og trapik sa Colon ug nagpurwisyo sa mga drivers ug pasahero. Ila napod nga gihimong terminal ang atubangang bahin sa Metro Colon.

* * *

Midaug si Pakman batok ni Margarito pero ina kay malipay ubay-ubay ang naguol kay pilde sa kasado. Ang kasadoay dili na kun si kinsa ang modaug tungod kay klaro na kaayo nga si Pakman. Ang ilang gikasadoan mao ang round diin mapakamang si Margarito. Apan ang resulta padayong nagbarog si Margarito hangtod nahuman ang dose ka round. Seguro maoy naa sa huna-huna ni Margarito nga bahala’g mapilde ni Pakman basta dili lang ma TKO.