Ang katapusang gubat sa uniberso

Pasiuna

Usa sa mga aliens nga sakop sa kasundalohan sa Jupiter ang miadto sa iyang labaw aron iyang isugyot kining mosunod: “Chief, ang mga yutan-on, mga walay hinungdang linalang. Mga walay kaantigohan og mga samokan. Busa mas maayo pa nga puohon silang tanan, total gamhanan bitaw ta kaayo sa atong galaxy nga nahimutangan. Ang iyang labaw nagkanayon: Kalma lang parts, ayaw gyud tawon na buhata, kay ang nimugna sa uniberso diin kita sulod nibuot nga mahimugso nga sama ning mga yutan-on.

Pagpalawom

Ang sugilanon nga atong nabasa dili pa lang dugay ang nagpakita kun unsa gyud diay kita ka bililhon sa Dios. Mao nga dili haom nga sa matag higayon nga makadungog kita og mga balita nga dunay kalambigitan sa katapusan sa kalibutan o sa mga katalagman bation dayon nato ang kalisang. Kay kining maong matang sa kinaiya ang nagpakita lamang kun unsa kita ka dili andam nga makigharong sa bisan unsang giisip nato nga malisud ug kalisdanan. Dugang pa, daghan kanato ang nahimong komportable na kaayo sa kinabuhing lumalabay daw buot kita nga mamahimong “instant” ang tanan.

Himoang pagapuy-an mo ang imong kinabuhi ingon nga kauban ni Kristo. Ayaw himoang mohunong kini sa mga makahahadlok nga taho sa katapusan sa kalibutan. Kay walay moilad kun wala’y magpailad. Hinunoa, himayaa ang Dios adlaw-adlaw sa imong kinabuhi pinaagi sa paghimo og mga maayong butang nga makapahimuot sa ubang mga tawo.