Maayo ang paghigpit sa lalawigan sa Sugbu sa pagprotehir sa atong kadagatan batok mga illegal fishers tungod kay masiguro niini nga ang umaabot nga henerasyon aduna pay makuhang isda ug mapuslan pa sa dugay’ng panahon ang kadagatan.
Ang mga umaabot nga henerasyon o mismong ang mga anak niining mga tripulante sa mga panagatan karon ug sa mga gagmay’ng mananagat mao man unyay sumosunod nga mananagat.
Sayod kita nga dili tanang mga mananagat karon ang nakapatungha sa ilang mga anak aron makatrabaho ug ubang matang sa panginabuhian. Kadtong wala gyuy ikasarang adto gihapon mapunta sa pagpanagat.
Kini gumikan sa kalisod sa kwarta bunga gihapon sa kagamay na sa ilang makuha sa atong kabaybayunan kay kinahanglan pa nilang mopalawod sa ubang lugar aron lang makakuha og daghang isda, unsaon naman lang kadtong walay mga makina?
Ang nasinati karong kagamay sa makuhang isda sa atong kabaybayunan ilabi na dinhi sa Visayas angayang ibasol sa gisundang henerasyon niining mga mananagat karon nga migamit usab kaniadto og ilegal nga pangisda.
Kun dili pakgangon kining illegal fishing karon hasta ang apo niining mga illegal fishers karon moagi gihapon niining kalisod ug mobalik-balik kini hangtud sa hangtud, moabot ang panahon nga balas nalang og patay nga gasang maoy makuha nato sa atong kadagatan.
Unsa naman lay kaugmaon sa kabataan kun gamitan og dinamita, pinong pukot, cyanide, hulbot-sinaw, sinsoro ug uban pang matang sa panagat ang mga gasang nga mao say gipuy-an niining mga semilya sa isda?
Dayegon ta ang Kapitolyo nga giseryuso nila kini, apan angayan usab natong sawayon ang atong kapolisan gumikan kay dugay na kining problemaha apan wala gyud nila aksyuni.
Karon lang sila mipakita og kaseryuso dihang mipagawas na og ngipon ang Kapitolyo. Kaniadto paman aduna na kitay balaod batok sa illegal fishing apan maihap lang sa mga nanggawas nga balita nga adunay nadakpang ilegal nga panagatan.