Mga tinonto ug binuang

Kun tinuod man nga dunay kahera sa Bureau of Customs nga nakadispalko og kapin sa P6.6 milyones angay kining pasakaan og kaso sa Commission on Audit (COA) dili kay igo lang sila nga mopagawas og report.

Nakapanglingo-lingo ko nga nagbasa sa annual audit report sa Bureau of Customs dinhi sa Sugbo nga usa ka Sunshine Saliendra midispalko kuno og P6,648,306 dihang cashier pa siya didto sa Customs PEZA Clearing Office sa Mactan kaniadtong Mayo 22, 2006 hangtud sa Abril 26, 2007.

Nakasabut ko kun nganong dugay nga nakadiskobre ang kadagkoan sa COA kabahin niining maong isyu kay ang kadagkoan sa Customs napakyas man sa pagsuperbisar nga matuman g’yud sa cashiers ang gilatid sa balaud.

Ang gipasabot nako mao ang kanunay nga pagsumiter og report ngadto sa COA kun unsa nay sitwasyon sa mga gihuptan nila nga accountable forms sama sa mga resibo ug uban pa.

Unya, kay kini si Sunshine Saliendra wala na man diay mo-report sa iyang duty diha sa Customs, awhagon nako siya dinhi nga kun gusto ka nga mohatag sa imong tubag, tawga lang ko sa 511-7984.

Kadtong nakaila ni Saliendra mahimo usab kamo nga mohatag og inpormasyon kanako. Pagka karon nagtanyag man kini siya og “web services” apan wala ko masayud kun hain na.

Awhagon nako ang COA nga kamo may gitugyanan sa kagamhanan pagproteher sa taxpayers money, himoi ninyo og aksyon si Saliendra. Dunay motug-an nako nga wala pa g’yuy kaso nga napasaka. Kining maong nahimo ni Saliendra klaro kaayo nga paglapas sa lagda nga gilatid sa Article 217 sa Revised Penal Code nga nagtangag og daghang katuigan sa pagkapriso kun mamatud-an siya nga sad-an.

Unya kamong mga opisyal sa Customs diha, lihok na mo! Ayaw pagsigi lang og kyogpos.

* * *

Nalipay ko sa gipahibalo ni Land Transportation Franchising and Regulatory Board-7 regional direktor Benjie Go nga mopadala na diay ang ilang ulohang buhatan og mga examiners nga mosusi sa mga prangkisa nga illegal nga giisyu ngadto sa mga taxi operators dinhi sa Sugbo.

Lauman nako nga ang team nga pagapangulohan ni Nida Quibic, ang chief sa LTFRB-Central Office Management and Information Division, dili matintal kay sigurado ko nga ang mga apektado nga operators mosuborno g’yud aron nga dili marebokar ang ilang prangkisa.

Mga walay uwaw kining mga tawo nga nalambigit niining maong anomaliya. Sila mga hearing officers sa LTFRB-7 nga bisan og nasayud nga dunay moratorium sa pag-isyu og prangkisa miinsistir g’yud pag-isyu.

Hilas kaayo tan-awon kining maong mga tawo apil na kadtong mga nangaging regional direktor sa LTFRB nga nalambigit niining maong sindikato. Unya, nasubo usab ko kay karon nga dunay direktor nga mibulgar sa anomaliya sa gidumala niyang opisina, duna say pipila ka media nga naninguha nga madaut ang pagkatawo ni Go.

Mitabang usab sa pagsulsol sa mga opisyal sa LTFRB aron nga mahulipan si Go sa pwesto. Pastilan, makaduda lang ta kun nganong tua sila makapusta sa pikas.

Dunay miingon nga maong walay amigo kini si Go kay dili man manghatag sa media, dili sama adtong nangaging regional direktors. Aw kini hinoon, dili ko makahatag og kumentaryo.

Wala ko makatunob sa opisina sa LTFRB dihang dili pa si Go ang regional direktor. Wala usab ko makadawat og bisan usa ka “diyot” gikan ni Go. Nagkapareho lang ang among baruganan nga kampanyahan ang binuang sa LTFRB.