( Ikatulo sa upat ka hugna )
Tuig 2010 gisudlan ko pagbalik ang politika. Dala ang paglaum nga aduna nay kausaban o mahatagan og kausaban ang dunot na nga sistima sa politika gisanong nako ang hangyo sa mga tawo nga gusto usab og kausaban. Nagpapili ko pagka konsehal sa barangay Quiot sa dakbayan sa Sugbo.
Tungod kay gustong makatabang ug motampo sa pagsulbad sa suliran sa barangay nga napasagdan lamang giapilan ko pagbalik ang politika. Tungod kay gusto nakong mapaambit sa akong mga katagi-barangay ang akong mga nakat-onan ug kahibawo aron ila usab kining mapahimudsan gitanyag nako ngadto kanila ang akong kaugalingon aron sila maalagaran pero ila kong gibalibaran kay ang kadaghanan kanila gipalabi ang salapi nga gitunol sa mamalitay og boto kay sa gitanyag nakong kaalam.
Ang Pundok kausaban nga gusto og kausaban sa politika ug matang sa pagpangalagad sa Barangay Quiot gisalikway sa mga tawo nga gusto lang og 20 pesos, 30 pesos, 50 pesos, 60 pesos ug 100 pesos nga gibayad kanila sa mga kandidato nga namalit sa ilang boto. Maayo gani kay ang usa sa among kauban nakakapyot sa ikapito nga puwesto sa pagka konsehal. Maayo na lang kay wa gyod masayang sa hingpit ang krusada namong kausaban.
Sa among pagsuroy ug pagbisita sa 34 ka mga sitio sa barangay among nakita ang mga suliran nga nanginahanglan gayod og dinaliang pagtagad. Ang kahimtang sa mga lumolupyo sa pipila ka dapit sa barangay nga gihulga ang pagpuyo sa nakaong-ong nang demolasyon mao unta ang nag-una sa listahan sa mga hatagan og pagtagad sa pundok kausaban human nako kini isugyot ngadto sa among kapitan . Ang hulga sa seguridad sa katawhan gumikan sa nagkabangi nga grupo sa mga gang, suliran sa ginadiling drugas, ang baha sa may Murillo compound, kangit-ngit sa palibot sa pipila ka mga sitio, kakuwang sa pansayan ug kahugaw sa pipila ka mga lugar sa barangay mao usab unta ang prioridad sa pundok kausaban. Ang paghimo sa Barangay Quiot nga pinuy-anan sa mga sikat nga atleta ug basketbolista ug ubang matang sa paugnat sa kusog nahanaw.
Ang gitanyag namong mga kaayohan para sa barangay gisalikway.