Supalpal

Sa nanglabay nga mga buwan gikastigo sa mga senador ug sa atong mga Kongresista ang makabuhong nga mga benepisyo nga gipahimuslan sa mga kawani ug opisyal sa mga government-owned and controlled corporations.

Apan samtang nangugat ang atong mga Senador ug mga Kongresista pagkundinar sa kamapahimuslanon sa mga opisyal sa mga GOCCs diin hapit nalang nila tungluhon ug balikason, ang ila pud diay’ng kaugalingon nga institusyon way sama ka salawayon.

Wa diay kalainan sa mga mapahimuslanon nga mga opisyal ug kawani sa GOCCs nga ilang gibalikas ang mga executives sa Senado.

Kasamtangan karong giimbistigar sa Commission on Audit ang gihulagway nga “excessive bonuses” nga gidawat sa mga executives sa Senado labi pa sa Senate secretariat. Sigun sa report kalima pil-on ang gidak-on sa mga allowances nga gidawat sa mga executives sa senado kay sa ilang binuwang sweldo. Salamat sa COA nga gisupalpal ang kamapalabi-labihon sa atong mga Senador.

Ang secretary nga dunay salary grade 31 magdawat ni og sweldo nga P48,000 matag buwan. Apan moabot sa P219,232.99 ang kantidad sa mga allowances nga iyang gidawat matag buwan.

Ang Director VI nga ubos sa salary grade 30 dunay monthly salary nga P34,000 apan magdawat og monthly allowance nga P104,733.32 matag buwan.

Ang usa ka Director V nga anaa sa salary grade 29 duna lay sweldo nga P30,000 matag buwan apan ang allowance nga gikobra niini sa Senado moabot og P77,115 ang buwan.

Ambot wala ba lang gyud masayod ang mga Senador sa maong kamatuoran o ilang gituyo pagpiyong ang ilang mga mata tungod kay sila may nakabinipisyo.Wala uroy manlimbawot ang balhibo sa mga kanahan nato nga mga Senador nga mangugat pagpangasaba sa mga opisyal sa GOCCs nga utro man pud diay silang angayang tulisokon.

Karon nga nabisto ang maong binuhatan, duna kahay usa sa mga sabaan natong mga Senador ang mangunay paghimo og imbistigasyon sa ilang kaugalingon nga institusyon?

Lab-as ug tukma ang hagit sa presidente sa Confederation for Unity, Recognition and Advancement of Government Employees kon Courage nga si Ferdinand Gaite nga kun gusto sa mga Senador nga manglimpiyo angayang silhigan nila og una ang ilang kaugalingong nataran.

Dili tinuod makiangayon sa ubang mga kawani sa gobyerno nga samtang sila nag-antos sa gamay kaayong sweldo ang ubang mga mapahimuslanon nagpatuyang og paburot sa ilang bulsa.

Moduyog ko sa panawagan ni Gaite nga angayang iuli ang mga allowances nga gidawat sa mga mapahimuslanong opisyal bisan og way basihanan diha sa atong balaud. Angayan sab nga ipakita sa atong mga magbabalaud nga seryoso sila sa ilang kampanya sa dili makatarunganon nga allowances sa gobyerno pinaagi sa pag-imbistigar sa ilang kaugalingon ug pagtangtang sa naghinubra nga mga benepisyo.

* * *

[email protected]