(Una sa upat ka hugna)
(Kining akong lindog gibahin nako ngadto sa upat ka hugna tungod kay midyo taas-taas. Nagsaysay kini sa akong kasinatian sa politika. Wa koy laing tumong sa pagsuwat niini gawas lang sa pagpaambit kaninyo nga gustong mosulod sa dunot nga sistima sa atong politika aron kamo makapangandam).
Tuig 2004 gibiyaan nako ang panibya ug gisudlan sa unang higayon ang politika. Apan naangkon ko dayon ang kaparotan.
Sa among lungsod sa lalawigan sa Bohol dasig kaayo kong nakighimamat sa akong mga dumadapig ug tagasunod sa akong tulomanon sa Radyo nga malipayon kaayong mitimbaya sa akong pagbisita kanila.
Gilibot ug gisuroy nako ang halos tanang barangay sa among lungsod aron masayran ang ilang kahimtang ug mahimoan og tubag o tabang ang ilang mga suliran pinaagi sa mga programa nga akong isugyot sa lokal ug nasudnong kagamhanan. Apan napakyas ang tanan tungod kay naangkon ko ang kaparotan.
Ang pahiyom sa mga tawo nga mitimbaya kanako human nila makita sa personal ang tawo nga tingog lamang ang ilang nadunggan sa kahanginan nagtimaan sa dili na mapugngan nakong kadaugan apan nasayop ko sa akong gituohan. Sa politika dili lang diay ang imong kailado maoy puhonan, gikinahanglan pa gyod diay nimo ang bulawan nga makapasilaw sa mata sa mga botante.
Sa politika dili ang imong katakos ug kahibawo maoy tan-awon sa mga tawo kun dili ang imong kuwarta nga ipalit ngadto kanila. Aduna man tood uban nga motan-aw sa katakos ug kahibawo sa ilang pili-on pero mas daghan gyod kanila ang motan-aw sa politiko nga nagtakos og kwarta.
Ang mga tawo dili na motan-aw kun may nahimo ba ang mga napili na nga gustong magpasubli ug sa gustong himoon sa mga kandidato nga magpapili pa. Mao ray ilang tan-awon ang kuwarta nga itunol sa kandidato sa bisperas sa piniliay. Dinhi sa nasud nawala na ang piniliay kay gipulihan na kini sa pinalitay. Tagsa na lang ang mga kandidato nga makadaug nga di mamalit og boto.