RONALD MONICKEY T.O.R
Giabot og tumang kahasol ang mga manimbahay sa matag higayon nga mosimba ang usa ka babaye nga magpunay lang og wara-wara sa iyang mga kamot panahon sa misa. Kay bisan unsaon siya’g badlong, hinunoa, maglagot man hinuon siya ug mangisog. Mao nga usa ka higayon niana, giduol siya sa kura paroko dayon gihunghongan siya. Ambot lang kay ang gihunghong nakapahipos man dayon sa mga kamot niadtong babayeng hilig sa pagwara-wara. Ang sekreto mao: “Giingnan sa pari ang maong babaye nga ang pagwara-wara sa mga kamot mao ang penitensiya alang kanilang mga mananapaw!”
Pamalandong
Usahay nahimong kataw-anan ang atong pagsimba panahon sa Santos nga Misa. Dili baya dautan ang magpadayag kita sa atong pagtuo ginamit ang mga bahin sa atong lawas apan kun kini pakitang-tao lang o dili ba kaha magdala lamang og disturbo sa ubang mga nag-ampo, nan mas tukma na lang tingali nga maghilom ug magpundo na lamang.