Hilumon maoy paghulagway sa iyang mga kauban diha sa buhatan sa Police Community Relations sa Police Regional Office-7 kang PO3 Osorio Ramiso, Jr.
Kinsay magtuo nga ang hilumon ug dili gani magtakin og armas mamahimong buhing bayani ug simbolo sa kaisog nga angayang mamahimong ehemplo sa tanang sakop sa kapolisan dili lang dinhi sa Sugbo kun dili sa tibuok nasud.
Saludo ko sa kaisog nga gipakita ni PO3 Ramiso dihang iyang gigukod ug gikapinusilay ang mga sakop sa gikaintapang grupo sa banggiitang mga tulisan gikan sa lalawigan sa Bohol niadtong Lunes sa gabii human manulis sa usa ka lending firm diha sa Uytengso Street sa Barangay Sambag I.
Tungod sa iyang kaisog nadakpan ang tulo ka mga tulisan diin duha kanila samaron human maigo sa ilang pinusilay. Nabawi sab sa kapolisan ang kapin sa usa ka gatos ka libo ka pesos nga nakuha unta sa mga tulisan.
Sila si Alberto Torregosa ug Shyrell Lambo Ostia nga pulos taga Bohol pulos samaron dihang nadakpan sa kapolisan sulod na sa buwag nga mga tambalanan. Ang lain nilang kauban nga si John Nuez nadakpan sab sa follow-up operation.
Human sa hitabo akong nahinabi si Chief Supt. Ager Ontog, hepe sa kapolisan sa rehiyon. Matud ni Ontog nga iya nang gimanduan ang hepe sa kapolisan sa dakbayan nga hikayon ang paghatag og pasidungog kang Ramiso.
Karong Lunes hayan madawat na ni Ramiso ang medalya atol sa matag semana nga flag ceremony sa PRO-7. Apan alang nako dili igo ang medalya lang sa kamabayanihon sa iyang nahimo.
Aron pagdasig sa ubang polis, angayang “spot promotion” maoy ganti nga ihatag sa kapolisan kaniya. Akong gipangutana si Ontog kun dili ba siya morekomendar niini.
Apan matud niya, duna kunoy proseso alang niini, diin limitado ang iyang gahom kutob ra sa rekomendasyon. Sanglit matud niya ang promotions board didto sa Camp Crame maoy dunay gahom niini.
Pwes, ayaw ihikaw General Ontog ang imong rekomendasyon alang ni Ramiso. Bisan og wala ko personal nga makaila sa maong polis apan usa siya sa tagsaon ra nga sakop sa atong kapolisan.
* * *