Daghan kaayong wala masayod, nga ang cyber sex kun pagpahulagway sa mga babayeng hubo mikuyanap na pag-ayo dinhi sa Metro Cebu nga maoy labing kusog nga sideline nga negosyo sa mga tag-iya o kaha nagdumala og internet café.
Ang nakapait kay dili na mga hamtong babaye ang gigamit sa maong negosyo kundili mga menor de edad na nga babaye
Gani matud pa ni Provincial Board member Agnes Magpale co-chair sa Provincial Council for the Welfare of Children (PCWC)nga usa sa nadiskobrehan nilang gigamit sa cyber sex , mao ang usa ka dos anyos nga batang babaye nga taga Cebu.
Apan ang hulagway niini ila nang nadawat gikan sa ilang mga kontak didto sa gawas, apan dinhi trabahoa sa dakbayan ang pagpahulagway niini.
Ang cyber sex gipadasig sa mga langyaw nga maoy mobayad sa mga tag-iya og internetan nga makalawog kanila og mga batang babaye nga magpahulagway nga hubo tibuok lawas.
Ang nakapait niini kay matud pa ni Evelen Senajon Early Childhood Care and Development Action Officer ning lalawigan, kay mas dagko og kitaon ang tag-iya og internetan kay modawat man kini og 300 dolyares matag bata, samtang ang mga menor de edad nga ilang makuhaan og hulagway piskan lang nila og P200.
Matud pa ni Senajon nga sa pagkakaron 20 kapin pa ka tag-iya og internetan ang napasakaan og kaso gumikan ning maong kabuang.
Daghang nagtuo nga kun dili mag-inabtik ang mga mayor sa kalungsoran ug siyudad sa pagsumpo niini, may kalagmitang mapareha ra ang dagan ning cyber sex sa illegal drugs nga inay masumpo, misamot na hinuon paglipang.
Angay usab bantayan sa mga ginikanan karon, nga kun makamatikod mong kuwartahan ang inyong anak panid-i basin nabuang na kini sa pag-estambay sa internetan apan dili magduwa kundi ang ilang lawas maoy paduwaang hubo atubangan sa camera.