Lugak ra ang seguridad sa Bar Exam

Gisugat og kaguliyang ang malipayong pagtapos sa Bar examination kaniadtong miaging Domingo didto sa Dela Salle University human mobuto ang usa ka granada sa nagdasok nga mga bar examinees ug ilang mga taga suporta. Taliwala sa kalipay tungod sa daw tunok nga naibot gikan sa kalawasan sa mga bar examinees nga nagtago ug nag-antos sa pagtinuon aron pasaron ang kinalisuran nga examination sa nasud, midungan sa kasaba sa nagkadaiyang drum and bugle corps nga naggubat sa ilang mga tugtog ang boto sa granada nga gilabay sa wa pa mailhing tawo nga responsable sa krimen.

 Ang granadang mibuto miangol sa 44 ka mga examinees ug mga taga suporta. Duha sa mga biktima ang gikinahanglan nga putlan sa ilang kamot ug tiil tungod kay dili na kini madala sa pag-ayo sa mga doktor.

Usa ka adlaw human sa hitabo, usa ka saksi ang mitunga sa buhatan sa kapolisan ug mitug-an nga usa ka lalaki nga kadudahan og linihokan nga ilang nabantayan ang responsable sa krimen. Ila kining gigukod apan nakalighot hinuon nahabilin ang pitaka niini ug ilang nailhan ang ngalan ug tinun-an siya sa College of Law sa University of San Jose Recoletos dinhi sa Sugbo.

Gipanalipdan hinuon sa iyang tunghaan ang maong tinun-an ug ilang giingon nga usa usab kini sa mga biktima.

Kung wa ko masayop, ang nahitabo kaniadtong miaging Domingo mao ang labing unang duguong hitabo sukad mapasiugdahi ang Bar examination pipila na ka mga tuig ang nakalabay. Busa ang mga police ug Korte Suprema nakalitan sa hitabo. Wa sila magtuo nga mao kadto ang mahitabo sa katapusang Domingo sa Bar examination.

Ang nahitabo bunga sa lugak nga seguridad nga gipatuman sa kapolisan didto sa kaulohan ug kapakyas sa intelligence division niini sa pagpaniid sa mga tawo nga adunay dautang plano.

 Ang Bar examination dili bag-o ug dili upod bag-o sa Korte Suprema ug kapolisan nga maghuot nga mga examinees ug ilang mga taga suporta busa gipangandaman na unta nila ang mga posibling himoon sa mga way lingaw sa atong katilingban.