Unsa g'yuy tinuod?

“Damage control” ang termino nga gigamit ni kanhi mayor Tomas Osmeña kun nganong gibulgar niya ang anomaliya pagmugna og mga infrastructure projects sa kabarangayan bisan og sa paghimo niya niini magkakontra sila og ang suod niyang higala.

Wala gayud magduha-duha si Osmeña pag-angkon nga nakahimo usab siya og sala kabahin niining anomaliya sa pagmugna og mga proyekto sa kabarangayan sa south district.

Apan gitataw ni Osmeña nga nakasala siya apan dili tungod kay apil siya sa nakakwarta, kun dili kay mihatag siya og daku nga pagsalig sa mga opisyal sa barangay.

Husto si Tommy. Tungod sa wala niya pagduha-duha paghatag og dakung pagsalig sa mga opisyal sa kabarangayan, posibleng maapil siya sa pagbasul sa katawhan.

Kahibudngan g’yud bitaw kaayo kun ngano nga kadaghanan sa mga barangay projects nahipunta man sa E.M. Arante Construction?

Buyno, tingali sila maoy labing barato og tanyag mao nga sila ang midaug sa bidding, kana kun tinuod nga dunay tinuoray’ng bidding. Usahay ra ba ang bidding kutob ra sa papel.

Nakasabot ko nganong misalig kaayo si Tommy sa mga kapitan sa kabarangayan. Mga dumadapig kini niya sa eleksyon mao nga giitsa niya ang tibuok niyang pagsalig.

Mao nga leksyon tingali ni Tommy nga sa sunod, kalma-kalma na Congressman.

* * *

Kaniadtong miaging adlaw, gisukna nako si Tommy kun tinuod ba gayud kining ilang away ni Guadalupe barangay captain Eugenio “Jingjing” Faelnar kay iya man kining “buddy.”

Gitubag ko ni Tommy nga dili na sakop sa BOPK si Jingjing. Gipangutana nako kun unsa diay. Gitubag kong Tommy “Bando Arante.”

Diha pa ko makasabot nga grabe g’yud diay kaayo ang kasuko ni Tommy kang Jingjing, kinsa maoy presidente sa Association of Barangay Councils, ang kahugpongan sa mga opisyal sa barangay sa dakbayan sa Sugbo.

Tungod niini, naapil ang anak ni Jingjing nga si Dino Faelnar. Dili na suportahan ni Tommy si Dino sa iyang pagpapili pagka kapitan diha sa Guadalupe.

Wala niya igsapayan nga usa kini sa laing rason nga molangyab ang ilang panagsungi ni Jingjing.

Ang rason ni Tommy nga kun si Dino molansar lang pagka konsehal, iya gihapon kining suportahan, apan kun ang daganan niini kapitan sa barangay, adto siya pusta sa kontra.

Gibutyag ni Tommy nga duna pay ubang mga proyekto diha sa Guadalupe nga wala pa mapatuman ug nabalaka siya nga kun si Dino ang modaug, ipapadayon kini ubos sa inpluwensya sa iyang amahan.

Gisukna ni Tommy ang mga reporters kun makabalibad ba kaha si Dino sa iyang amahan kun momandar kini kaniya nga ipadayon ang proyekto?

Halos natingub ni Jingjing ang kasuko ni Tommy tungod kay siya man gud ang presidente sa ABC. Isip presidente, matud ni Tommy nga daku kaayo siya og mahimo nga walay binuang sa mga proyekto sa barangay nga gigastohan sa City Hall.

Giangkon ni Tommy nga kining maong isyu magsilbi kini nga ehemplo sa ubang mga barangay ug posible nga kun duna sila’y plano nga dautan, dili na nila idayon.

Ang bahad ni Tommy nga kun ilang idayon ang dautang plano unya masakpan, patay g’yud apil ang ok-ok.