Nadakpan na ang nagtupi nimo Sir? Mao kini pagya nga nakabaton og katumanan sa kinabuhi ni Senior Inspector Mario Monilar, hepe sa Guadalupe Police Station sa dihang gipapriso niya human ipadakop si Jessie Tacumba, 32, ang barbero nga mipahak sa iyang buhok niadtong Biyernes sa buntag.
Ang pagkabarbero , dili usa ka gamay nga butang tungod kay ikaw ang naghatag og arte sa buhok sa tawo. Kun magdanghag ka sa pagtupi sa buhok, moresulta kini sa pagkakataw-anan sa tawo nga imong gitupihan ug dili makahatag og maayong kaugmaon sa usa ka-barbero.
Kay diha sa tupi , masukod nimo ang matang sa tawo nga nagpatupi. Ang maayong tupi, makapauswag sa personalidad ug ka-desente sa usa ka tawo, apan makawala usay angay sa usa ka tawo nga binuangan lang pagtupi sa usa ka manunupi.
Busa ang mga desenting tawo may kaugalingong suki nga barbero, may kaugalingon usab siyang sastre o mananahi alang sa iyang mga senina ug karsones, kini tungod kay daghang manunupi ug mga sastre nga dili kapiyalan sa ilang trabaho.
Sama niining barbero nga gipapriso ni Sr. Ins. Monilar, kutob sa nasayod sa iyang gibuhat sa usa ka hepe sa polis, wala nay si kinsang sibilyan o bisan mga ordinaryong polis nga mopatupi kaniya.
Kini tungod kay , bisan wala niya tuyoa ang pagpahak sa ulo sa dakong opisyal sa polis, nagpakita siya sa iyang pagka-arogante nga bisan nagpaila na si Ins. Monilar nga hepe siya sa polis ug gihangyo nga pangitaan og paagi nga bisan napahak, matarong gyud og dyutay, aron dili kaayo mailhan nga wala magkadimao ang iyang tupi, wala gyud siya mosanong sa mando sa maong opisyal.
Kun iya kadtong gibuhat sa usa ka otoridad sa balaod, dili kaha labaw pa niyang buhaton ni kinsa man, ilabi na kun sibilyan ka lang?