Paghilom Donald Tsang

Sa dihang nahitabo ang hostage drama nga mikalas og walo ka mga kinabuhi ug miangol sa lain pang mga turistang taga Hong Kong bisag unsa na lang ang gipanulti sa opisyal sa maong lugar sa China sa atong gobyerno sa Pilipinas. Apan wa nato kini baliha tungod kay atong gisabot ang ilang gibati tungod sa wa damhang hitabo. Atong gidawat ang bisan unsa nilang panginsulto sa atong gobyerno.   

 Tungod kay adunay kasal-anan nga nahimo ngadto sa ilang mga nationals ang mga police sa kaulohan nga misuway sa pagluwas sa mga Hong Kong nationals nga gipang-hostage sa usa ka problemadong opisyal sa kapolisan gidawat nato ang ilang mga pagsaway. Atong gipaapil ang mga police sa Hong Kong sa pag-imbestigar sa nahitabong hostage - masaker aron molurang ug mapakita sa nasud sa Pilipinas ngadto sa Hong Kong ug China nga tininood ug dili drama ang pagtubag sa gobyerno sa dili maayong hitabo.

Apan niining bag-o murag miabuso na ang opisyal sa Hong Kong nga ginganlan og Donald Tsang. Ang nahisgutang opisyal mao ang mitawag ni Pangulong Noynoy Aquino ug nagbagulbol tungod kay wa siya tubaga niini. Siya ang giingon sa mga tigbalita nga mipadala og sulat panginsulto ngadto ni Pangulong Aquino. Sa suwat nga iyang gipadala ngadto sa pangulo sa Pilipinas giingon matud pa nga gidiktaran ug gimandoan ni Donald Tsang ang Pangulong Noynoy Aquino.

Panahon na seguro nga pahilumon na sa nasud sa China ug sa pangulo niini si Donald Tsang tungod kay misobra ug milapas na siya sa iyang gahom isip opisyal sa Hong Kong. Ang gihimo ni Donald Tsang dili na makapalambo sa maayong relasyon sa Pilipinas ug China.

Mas maayong buyagon na sa pangulo sa China diin nahisakop kining Hong Kong sa mga gipangluwatan niining panginsulto sa pangulo sa Pilipinas. Kay si kinsa ba kini si Donald Tsang nga magdiktar ug magmando sa pangulo sa Pilipinas? Usa lang siya ka Chief Executive sa Hong Kong nga sakop sa China. Sa ato pa gobernador lamang siya kun ania pa siya dinhi sa Pilipinas.

Kun nagtoo si Donald Tsang nga puwede na niyang madiktahan ang pangulo sa Pilipinas tungod kay giuyon-uyonan siya sa kagamhanan niini, nasayop siya. Angayan niyang masayran nga gusto lamang ipakita sa kagamhanan sa Pilipinas nga matinud-anon kini sa iyang gihimong imbestigasyon ug pagtaral sa mga sad-an sa hitabo ug dili tungod kay magpaawot na lamang kini ug moyuko sa iyang mga tuhod. Maong paghilom Mr. Donald Tsang.