Ang Hong Kong

Tungod sa masaker didto sa Manila di pa lang dugay diin walo ka turistang taga Hong Kong ang namatay, ang mga Pinoy karon kanunay nang mohisgot sa kanhi British Colony.

*  *  *

Dihay panahon nga ang Hong Kong maoy numero unong pabrikante sa mga toys kon duwaan sa mga bata. Gituohan nga ang Japan maoy numero uno apan ang Consumers Exchange miingon nga ang Made In Japan toys ikaduha ra sa Hong Kong. Hinoon kaniadto pa kini sa ubos pa sa British Empire ang HK.

*  *  *

Aduna karoy 200,000 ka mga Pinay domestic helpers sa Hong Kong. Mas daghan pa sa populasyon sa usa ka lungsod dinhi sa ato.

*  *  *

Gamay ra kuno ang suweldo sa mga Pinoy didto sa Hong Kong apan naay pipila kanila nga nakapamalit og yuta sa ilang kalungsuran, nakapatukod og bay, ug nakapahuman sa kolehiyo sa ilang mga igsoon.

*  *  *

Naa say domestic helper nga Sugbuanon nga nakatukod og dakong tindahan sa dry goods dinhi sa Sugbo gikan sa iyang hinaguan nga suweldo.

*  *  *

Usa ka Sugbuanong DH sa HK gidala sa iyang employer sa Canada ug didto gipangasawa siya. Karon administrative assistant siya sa iyang bana nga nahimong president and CEO sa usa ka corporation sa Toronto.

*  *  *

Duna koy usa ka higala nga niadto sa Hong Kong mga 25 ka tuig na nga minglabay. Human sa maong gidugayon nga nawa siya sa Sugbo mitumaw kini adtong miaging tuig nga presidente na sa usa ka hotel sa Kowloon area.

*  * *

TRIVIA -- Belated fiesta greetings sa atong mga higala diha sa San Nicolas, Cebu City. May the beloved Patron Saint continue to bless the people living there.