Ang drugas, HIV/AIDS ug kawad-on

Ang Philippine Drug Enforcement Agency o PDEA sa ilang taho nga gipagawas kaniadtong tuig 2008 miingon nga miabot na ngadto sa upat ka milyon ang mga adik sa Pilipinas. Katunga niining maong gidaghanon mga lalaki nga anaa sa pangidaron nga 20 ngadto sa 29 anyos. Kadaghanan sa mga adik ilang gitawag og “Ply drug users” kini tungod sa kadaghang klase sa drugas nga gigamit. Samtang ang talaan sa Departamento sa Panglawas mitaho nga misulbong sa makadaghan ka pilo ang kaso sa HIV/AIDS dinhi sa Sugbo. Sigon sa ilang talaan, gikan sa tuig 1989 ngadto na sa tuig 2009 o sulod sa biyente (20) ka tuig nakatala lamang sila og 95 ka mga HIV positive dinhi sa Sugbo apan niining tuig 2010 sulod sa unom (6) ka bulan lamang gikan sa Enero hangtod sa Hunyo miabot na ngadto sa 150 ang mga tawo nga nagka HIV positive nga posibling mahimong AIDS.

Nasuta sa departamento sa panglawas nga ang pagsaka sa gidaghanon sa kaso sa HIV dinhi sa Sugbo naggumikan sa paggamit og ginadiling drugas sa mga nataptan niini human angkona sa mga nagka HIV ngadto sa mga opisyal sa panglawas nga naghulamay sila og dagom sa ilang paggamit og ginadiling drugas. Ang World Bank sa ilang bahin mipagawas usab og taho nga 70 porsiyento sa mga Pinoy nagpuyo sa kita nga tag 42 pesos lamang matag adlaw. Gawas niini aduna usay upat ka libo ka mga Pinoy ang gipanggutom o walay mga kaon. Sa iyang 1.645 trilyones ka pesos nga budget alang sa tuig 2011 ang kagamhanang Aquino mihatag sa pinakadakong gahin niini alang sa pangbayad sa atong utang sa gawas nga wa gyod maimpas. Sa tuig 2011 nga budget, 357.1 bilyones ka pesos niini ang gigahin sa pangbayad sa utang, 286.9 bilyones ka pesos ang gigahin alang sa Internal Revenue Alotment ug 22.4 bilyones ka pesos ang para sa kontribusyon sa gobyerno ngadto sa retirement ug life insurance sa mga kawani niini. Ang nahabilin sa budget mao ang gibahin-bahin usab sa ubang derpartamento sa gobyerno sama sa edukasyon, nasudnong depensa ug uban pa.

Subo nga palandungon sa katawhang Pilipinhon nga sa ka dako sa budget alang sa tuig 2011 mas gihatagan og gibug-aton sa kagamhanang Aquino ang pangbayad sa utang sa gawas kay sa atong unang mga panginahanglanon.

Ang kampanya batok sa suliran sa ginadiling drugas, suliran sa HIV/AIDS ug kawad-on ngitngit ang padulngan tungod kay apektado kini sa gamay nga pundo nga gigahin niini. Seguro tuyo sa kagamhanang Aquino nga mamahimong adik, magka HIV/AIDS ug kabus hangtod sa hangtod ang mga tawo dinhi sa Pilipinas.