Aniay suwat gikan ni Jaime Deodato, nagpailang gay kon bayot, kinsa lumad nga Bol-anon apan dinhi sa Sugbo nadaku. Gipaagi kini sa postal service.
* * *
Si Jaime mipadayag sa iyang hugtanong oposisyon sa mga plano nga separahon ang CR kon kasilyas sa mga bayot sa CR sa mga lalaki nga dili bayot. “Kaming mga bayot dili mosugot nianang tinontoha,” matud ni Sr. Jaime.
* * *
Si Jaime, kinsa matud niya 50 anyos na, gustong i-address nga “Sir Jaime” isip pagtahud kuno sa iyang pagkalalaki. Ug “amahan sa lima ka anak nga pulos babaye.”
* * *
Matud ni Sir Jaime: “nganong separahon man ang kasilyas namong mga bayot? Ang nagplano niini tunay ba nga lalaki? Nakaanak ba siyag lima sama kanako nga nailhang bayot sa maong dapit?”
* * *
Puno siya: “Pagpakauwaw lang kanamong mga bayot sertipikado kanang plano sa mga kunohay lalaking tunay apan di kamao makahatag og anak sa kalibutan suma sa sugo sa atong Makagagahom.”
* * *
Dugang pa gyud ni Sir Jaime: “Wala pa mahitabo bisan asang dapit sa kalibutan nga gilain ang kasilyas namong mga sertipikadong bayot sa mga gitawag nilang lalaking tunay apan walay anak nga ikapakita nga sila lalaking tunay.”
* * *
Matud pa gyud ni Sir Jaime: “Kaming mga bayot kanunay lang gibinuangan. Hastang pagmugna og party-list gisuwayan pa nila’g babag ... Tawo ra baya mi. Sama sa nagpabilib nga sila lalaki, duna sab mi duha ka itlog....”
* * *
Daghan pang mga rasones si Mr. Jaime apan putlon na lang nato dinhi ang iyang mga argumento....”
* * *
TRIVIA -- Malipayong kapistahan diha sa sitio Avocado sa barangay Sta. Inez, lakip na si Mr. & Mrs. Ramon Cuartero. Wa lang hisguti sa nagpada sa greetings ang lungsod diin nahisakop ang Sta. Inez.