KBP month karon!

Pormal nga buksan karong adlawa ang Broadcasters Month dinhi sa Sugbo.

Kini pinaagi sa pagpahigayon og Broadcasters Congress nga anha ipahigayon sa bag-ong Mariners Court building sa Pier-1, diin ang sibyaanan sa DYLA mahimutang.

Ang mga magsisibya sa telebisyon ug radyo dinhi sa Sugbo nga accredited sa Kapisanan ng mga Brodkaster ng Pilipinas (KBP) gipaabut nga maghugop sa maong kalihukan.

Alang niadtong dili pa accredited, sayod ko nga dunay giandam nga seminar ug KBP accreditation test ang kadagkoan sa KBP atul sa usa ka buwan nga kalihukan.

Sigi, awhagon nako ang mga kauban ko nga mga magsisibya sa radyo ug telebisyon nga hugopan nato ang kalihukan karong buntag. Unya, balik-balikon g’yud nako nga kinahanglan g’yud nga duna unta’y mga seminar-workshop ang KBP aron motudlo sa mga bag-ong magsisibya, mga reporters sa tukmang gimbuhaton.

Bisan gani ang mga dugay na sa media, apil na ako, mahimong patambongon. Kinahanglan nga dili kita magpabilib nga ngilngig na g’yud ta kay usahay masayop man g’yud ta.

Ako bisan dugay na ko sa mga trabaho sa pagpanibya apan bukas ang akong huna-huna nga modawat og mga sugyot.

Duna man go’y uban diha nga reporter nga madunggan nako nga mamalikas sa ilang report ug mohimo’g kumentaryo samtang magbalita. Ang sagad nako madunggan sa ubang reporter nga moreport kabahin sa mapalgang patay nga “puya,” moingon dayon nga ang puya “gilabay sa walay puangod nga inahan.”

Nganong butangan man g’yud og pulong nga “walay puangod?”

Lain nga akong nadunggang report sa usa ka reporter miingon nga ang biktima sa pagpamusil gidala sa “may” Vicente Sotto Memorial Medical Center.

Kun mao kana, ang biktima mahimong mamatay kay wala man g’yud diay kini dad-a sa ospital, diha ra man sa “may” VSMMC, mahimong sa punoan sa kahoy duol sa ospital.

Karon lang bag-o dunay reporter nga mireport ug gipadungog niya ang “voice clip” sa city treasurer apan wala ipasabot unsay gipasabut sa gisulti niini.

Lain usab nga reporter mireport nga klaro kaayong wala makasabot unsa ang iyang gireport. Naglambigit kini og kaso didto sa korte apan wala gani makaila sa huwes nga nag-preside sa maong RTC branch.

Wala pa ko malimot nga kaniadto dunay usa ka seminar alang sa mga reporter nga ang tema, “From police blotter to the final order.” Gitudloan ang mga reporters, ilabi na ang mga nadistino sa police beat, sa dagan sa kaso gikan sa kapolisan ngadto na sa pagpasaka og kaso sa hukmanan.

Mahinungdanon kaayo kini aron nga ang usa ka reporter makasabot sa iyang balita.

Alang nako ang usa ka news reporter angay nga masayud sa mga lagda gikan sa pagdakop ngadto na sa pagpasaka og kaso.

Kun ang usa ka reporter gud suheto sa mga lagda authority kaayo sila nga mosulti kay dili man sila magduha-duha. Kun dili gud sila sigurado mahimong mag-ukon-ukon sila pagreport.

Kini maoy angay nga hinuktokan sa mga news directors sa lainlaing mga sibyaanan, apil na sa mga editors sa mantalaan.

Alang nako mahinungdanon man gani nga ang usa ka reporter madistino g’yud sa tanang beat aron sila masuheto sa mga isyu.

Apan subo lang kay dunay ubang reporters nga mahadlok madistino sa korte kay kuno lisud. Lisud g’yud hinoon apan anha masukad ang imong kalantip sa salabotan.