Ang kamatayon sa magsuong Kris ug Renier Paran tungod sa pagka-anod sa baha nga kalit mibanlas sa sapa didto sa sitio Cabu-an, barangay Cogon, siyudad sa Naga angay mopahigmata sa mga politiko sa lalawigan sa Sugbo nga aduna pa diay silay dakong kulang ngadto sa ilang mga konstituwente sa kabukiran.
Silang Kris ug Renier, 13 ug 8-anyos, kauban sa ilang igsuon nga si Renel ug sa ilang lola nga si Agripina Paran, 55, nanglabang sa sapa gikan sa pinuy-anan sa mga bata sa West Poblacion, siyudad sa Naga paingon sa sitio Cabu-an sa dihang mibanlas kanila ang dakong bul-og sa tubig-baha.
Pila pa ka barangay sa lalawigan ang ingon og sitwasyon sa barangay Cabu-an diin ang mga tawo kinahanglang mo-ubog sa tubig sa sapa aron makalabang sa pikas tampi? Ug pila na ka tuig nilang gihimo ang paglabang og sapa nga walay taytayan?
Ang simple nga “foot bridge” nga katungtongan sa mga tiil sa mga residente igo na unta aron makalabanglabang sila sa sapa nga dili mag-ungaw sa risgo ang ilang kinabuhi.
Laing problema nga wala masulbad sa kagamhanan sa lalawigan sa Sugbo mao ang pagdagsa sa mga quarry operators ngadto sa kabukiran sa Sugbo nga kusog kaayong mangubkob og mga anapog, bas ug graba nga naka-apekto sa kayutaan sa kabukiran.
Nakaabot na sa buhatan ni Gob. Gwendolyn Garcia ang report kabahin sa mga quarry operators nga anaa mag-operate sa barangay Cogon sa Naga, mga barangay Cuanos, Tubod ug Manduang sa Minglanilla nga nakadaot kaayo sa kinaiyahan.
Apan tungod kay lahi ang prayoridad ni Gob. Garcia, nataligam-an ang maong mga suliran sa mga residente sa kabukiran.
Ang gigasto unta sa pagpatukod nianang ‘white elephant’ nga Cebu International Convention Center (CICC), gigasto sa mga kalihukan sa Kapitolyo nga walay hinungdan ug ang gipalit sa tubig-dagat nga gibaligya sa pamilyang Balili sa Naga sobra na kaayo aron ipatukod og mga foot bridge nga igong magamit paglabang sa mga tawo agi sa sapa.
Ug ang oras nga iyang gigugol sa pagpunay og pangaway ni Kongresista Tomas Osmeña ug ni Mayor Maria Luisa Loot sa Daanbantayan mahimo unta niyang magamit aron ma-monitor ang paggukod sa mga quarry operators nga nakadaot sa kabukiran sa lalawigan.
Maghulat pa ba kita nga mapun-an og laing kinabuhi una pa aksiyonan ang maong simpleng mga suliran sa kabukiran?