Magna Carta
Human sa dugoon nga pagpang-hostage sa kanhi polis nga gitaktak sa serbisyo didto sa Manila sa miaging semana, mitumaw karon ang sugyot alang sa pagpasar og balaud nga magprotehir sa mga tinugyanan sa balaud gikan sa mga kaso nga gitumong pag-harass kanila.
Ang kanhi undersecretary sa Dangerous Drugs Board nga si Atty. Paul Clarence Oaminal misugyot pagpalabang sa Magna Carta for Law Enforcers.
Kini aron kahatagan og proteksiyon ang mga sakop sa kapolisan ug sa ubang ahensiya nga nalambigit sa law enforcement operations labi pa gyud sa kampanya batok sa illegal nga drugas.
Tumong sa maong Magna Carta aron malikayan ang pagkasubli sa nahitabo sa hostage taker nga si kanhi Sr. Insp. Rolando Mendoza diin gilabay didto sa Mindanao human gikasuhan tungod sa ilang pagdakop sa usa ka gidudahang durugista.
Resulta wala na maatiman ni Mendoza ang iyang kaso didto sa Manila sanglit gilabay man siya didto sa Mindanao. Misampot hinuon sa pagkataktak niya sa serbisyo nga maoy nag-aghat sab niya sa pagpang-hostage aron paminawon siya sa gobyerno ug ibalik siya sa serbisyo.
Ang ingon niini nga sitwasyon maoy gustong likayan ni Oaminal pinaagi sa Magna Carta for Law Enforcers. Haum ang maong sugyot ug hinaut nga dunay mga magbabalaud nga mosuporta niini.
* * *
Angayan sab tingali nga susihon sa atong gobyerno kinsay responsabli pagbalhin ni Mendoza sa Mindanao kaniadto tungod kay matud ni Oaminal gidili diay ang pagbalhin sa usa ka tinugyanan sa balaud gawas sa rehiyon o sa dapit diin siya nakabaton og kaso tungod sa kampanya batok sa illegal nga drugas.
Sumala pa nga basi sa Dangerous Drugs Board Regulation No. 6, Series of 2008 nga gipasar niadtong panahon ni Senator Vicente Sotto isip chairman sa DDB hugtanong gidili ang pagbalhin sa polis nga saksi sa usa ka kaso nga naglambigit sa illegal nga drugas.
Si Mendoza usa sa mga mipasaka og kaso batok niadtong estudyante nga ilang nadakpan nga nag-illegal parking ug nasuta nga dunay illegal nga drugas.
Tungod kay mibawos ang dinakpan ug gipasanginlan silang nangilkil gibalhin siya didto sa Mindanao. Ang kalayo sa iyang assignment maoy posibling hinungdan nganong wala niya maatiman ang iyang kaso.
Kun kalapasan ang pagbalhin niya og assignment makatarunganon lang tingali nga manubag ang responsabli pagbalhin niya tungod kay mao ni ang gamot sa nahitabo.
* * *
- Latest
- Trending
